Chhiáⁿ an-chong NunitoPOJ jī-hêng, phòe-ha̍p Firefox Browser lâi tha̍k.
請安裝NunitoPOJ字型，配合Firefox瀏覽器來讀
◎李南衡
福伯看我入in ê門tio̍h hàiⁿ頭、吐大氣。我問講：「是啥代誌hō͘你chiah呢無歡喜？」
福伯講：「3月27中晝，馬英九前總統飛去中國，講是『祭祖和平之旅』，che是74年來，頭一个中華民國卸任總統去中國。伊ê旅程預定12工，先飛上海，而後去南京、武漢等城市。3月30，馬英九參觀武漢市檔案館『英雄城市抗擊新冠肺炎疫情武漢保衛戰專題展』，講員提起當時佇武漢ê台胞無法度轉去台灣。馬英九講：『真歹勢，阮政府造成恁ê困擾。』馬英九是啥物人會tàng代表咱政府向中國人會失禮？」我應講：「伊是咱台灣落任ê總統。」
福伯聽了煞笑出來，講：「早前咱台灣有乞食一家一家去kâng分，若有人the̍h錢抑是食物hō͘伊，伊會停落來唸唱一段勸世歌，koh用伊phāiⁿ佇胸前ê月琴伴奏。我會記得有一節是：『咱來出世無半項，轉去雙手又空空，tiàm chit世間ná眠夢，死了江山讓別人。』我上kah-ì尾句『死了江山讓別人（sí-liáu kang-san niū pat-lâng.）』。永過皇帝做到死，今仔日台灣kah真濟民主國家仝款，無論是總統抑是縣市長攏是民選ê，毋管是一任抑是連任，任期滿tio̍h落台，伊tio̍h m̄是總統抑是縣市長ah，ná像永過皇帝死了，江山tio̍h讓別人。馬英九是啥物人？你講了真tio̍h，伊是咱台灣落任ê總統，現時kah你我仝款是一个平民，伊有啥資格會tàng代表咱政府向中國人會失禮？真正是m̄ bat芳臭！」
「2022年12月29，新就任ê台北市長蔣萬安講伊已經指示社會局明年tio̍h送1500箍重陽敬老金。前台北市長柯文哲上任了後，kā每年重陽節分hō͘ 65歲以上長者每人1500箍ê敬老金取消，因為議會ê要求，路尾佇伊卸任半年前宣布規劃會tī明年恢復，但是金額kiu水變作1200箍。蔣萬安tī選舉進前tio̍h承諾，伊若當選tio̍h會重新送1500箍ê重陽敬老金，今仔日伊視察社會局業務了後受訪問ê時mā講伊已經指示社會局，明年tio̍h恢復1500箍敬老金。29下晡，前台北市長柯文哲表示，chit款ê改變伊雖然無意外，但是猶原有一寡失望，向望新政府有koh khah濟ê道德勇氣，m̄ thang kā債務留hō͘囝孫，台北市應該做ê是真正ê社會福利政策，m̄ thang koh行倒轉去民粹政治ê老路。柯文哲是啥人？管kah hiah濟？」我緊應講：「台北市落任ê市長。」福伯煞笑出來，講：「落任ê市長ná-chhiūⁿ死了ê皇帝，江山讓別人，kah你我仝款是一個市民，管hiah濟！」
歐洲kap北美ê民主先進國家，真少落任了ê總統抑是總理，烏白批評現時ê政府。Che tio̍h是民主素養、民主風度。因為江山已經讓別人ah！
