Chhiáⁿ an-chong NunitoPOJ jī-hêng, phòe-ha̍p Firefox Browser lâi tha̍k.
請安裝NunitoPOJ字型，配合Firefox瀏覽器來讀
◎陳柏壽
Tòa加州柑仔縣有一个台灣人叫阿土伯仔，定定佇網路中教人按怎種花、種果子、插柑仔，真濟人攏知。有一擺佇節目中，伊講伊佇台北做兵ê時去天母後山給人偷挽柑仔，hō͘柑仔園ê主人掠tio̍h，就hō͘主人掠來做in查某囝ê家庭教師，做幾仔年，後來煞變做柑仔園ê囝婿。這項代誌真正是「種匏仔生菜瓜」。人去in柑仔縣學種水果，定叫in某出來展，講是伊去偷挽柑仔ê最大ê成績。親像舊約聖經內底雅各為著欲chhōa拉結閣kā in丈人拉班加做7年苦工共款。久來咱才知，艱苦chhōa來ê某，khah chai疼惜。
人生無定定是好天。我以前ê頭家kā我講：「去到佗位，落雨水攏是冷ê。」阮老爸去日本讀冊，轉來台灣，阮阿公去hō͘人三七五減租，本來對古坑一直到西螺北港攏有土地，但是一聲對大好額摔落去變做散赤人。
我是斗六庄腳出身，阮老爸飼六個囝，我猶會記佇老牛拖甘蔗對庄頭過，阮這群囡仔就去偷giú甘蔗，甘蔗縛真ân，giú袂出來，阮親像狗蟻去粘tioh含仔糖，甘蔗giú袂出來，阮手閣毋甘放，顧牛車ê原料仔大聲咧喝：「夭壽猴囡仔恁閣來偷giú甘蔗！」這個偷giú甘蔗ê故事是我一生攏袂忘記ê英雄歷史。細漢時代啥物歹事攏做：偷挽荔枝、偷a̍t龍眼、招群結黨、相拍、考試偷看，無所不至。我對少年時期就是kah這寡囡仔做伙，kap in交結真深。因為按呢，我對外口世間ê人bat真濟，有了解，嘛真同情。一直到我入教會，讀神學院，做牧師，我攏毋敢看in做外口人，毋敢叫in世俗人。我一直感覺in就是我ê好兄弟。
阮老爸去日本讀冊，轉來故鄉，煞揣無頭路。姑不將chhōa 6个囝，對斗六搬起來台北。我猶會記得全家坐8點鐘ê慢車，tòa入去民生路雙連車頭火車路邊ê一間用a-iân-phiáⁿ（亞鉛鉼，薄鐵鉼）釘ê違章建築。有一擺我kah阮老爸騎鐵馬，載藥箱仔，去到石碇仔，欲佇遐做密醫，去hō͘警察趕出來。我猶會記佇阮老母坐佇門口咧哭。
佳哉天公疼戇人，經過彼爿keystone（石牌）教會ê昭煇兄ê阿姑劉老師ê介紹，阮老爸chiah ē tàng去石牌國校做教員。按呢一个做做45冬。
聖誕節ê時阮查某囝京薇講欲慶祝阮結婚50週年，載阮去Vancouver東爿ê一个小所在叫做Harrison，講彼就是咱遮唯一ê溫泉，實在講kah日本比起來，毋是溫泉，不過是lâ-lûn燒ê燒水（註：斗六人講ê半燒冷），洗tio̍h真袂爽。但是咱hō͘人招待，毋敢嫌，干單講一直講：「真好真好！」這世間，燒水無sêng燒水，咱嘛毋敢嫌！
轉來ê路邊經過Mt Vernon山區，彎彎曲曲，Alger路邊有看tio̍h一粒大石，頂面油漆到花紅柳綠，畫到oai-ko-chhi̍h-chhoa̍h，石頭跤有人插花佇遐。後來才知有爸母佇遐記念交通事故ê囡仔所設ê記念石，看了hō͘人心情真鬱卒。
毋知啥物原因，最近時常夢著細漢大漢ê彼條溪水彼爿山，New York ê台灣人若做伙就會唱彼條故鄉ê歌：「叫著我，叫著我，黃昏ê故鄉不時咧叫我，叫我這个苦命ê身軀，流浪ê人，無厝ê渡鳥。」「彼爿山，彼條溪水，永遠抱著咱ê夢。」「白雲啊，你若欲去，請你帶著我心情，送去hō͘伊我ê阿母。」「O͘i……毋通來袂記eh！」漸漸彼條歌soa̍h親像變做咱ê國歌lah！
有一个少年人叫林強，伊有唱「向前行，啥物攏毋驚」，唱「踮佇田中ê老阿伯，攑一枝鋤頭戴koe-le̍h（瓜笠），問伊今年有幾歲，囝孫仔有偌濟？」「伊講：馬馬虎虎會得過，大漢細漢攏佇市內做頭家！」這句話可能是講台灣人勤儉，毋甘願閒閒踮厝無做代誌；但是mā有可能另外一个khah深ê所在，伊講袂出喙，致使這个年老ê老爸猶佇北風sǹg–sǹg-叫ê鐵枝路跤咧賣黑輪！每人攏可能有這種心酸ê故事，但是講袂出喙，驚人知影，這是真正ê世界。
上帝創造咱做一个台灣人，我相信有特別ê意義，就是咱做一个台灣人不但是上帝用智慧創造ê作品，特別是因為咱台灣人是經過艱苦出身ê人khah濟。
天地萬物未有世界穹蒼田野以前，就是有智慧，上帝用智慧來做人，做出世間所有ê人。一切ê人，是上帝用智慧創造出來上蓋尊貴、上蓋寶貝ê寶貝。上帝是創造人ê師傅頭。這是箴言第8章22～36節互咱第一珍惜ê聖經節。這是世間人ê根本。菲律賓馬尼拉ê幾萬人生活佇糞埽山頂大漢ê人，若是hō͘ in有基本ê生活kap教育，in一定kap咱仝款有知識kah尊嚴。
詩篇第8篇嘛是咧講仝款ê基本道理。詩人講：上帝創造人hō͘ 伊管理天頂ê鳥、海ni̍h ê魚kap其他上帝創造ê世間萬物，所以人變做何等尊貴ê動物。人變做上帝頭殼頂ê榮耀kap冕旒。
我想聖經中第一簡單、第一實在、第一好記ê一句話，嘛是我上意愛ê一句，就是保羅所講ê彼句話，伊講：上帝離開咱無偌遠，因為咱攏佇上帝內底來活，來振動，來行路，來講話，來來去去，食飯，歇睏，做上帝ê囝兒，活落去（使徒行傳17章28節）。意思kah咱台灣人彼句話相款：頭殼頂3吋有神明。咱普通時無咧注意，其實咱台灣人講話kah聖經內底講ê話，真濟是差不多。咱攏著會記lih，對方kah咱攏是仝款ê人，無論伊拜啥物神明，無論伊是查埔查某，無論伊是大漢細漢，有錢無錢，kah咱攏仝款，in頭殼頂3吋有神明，攏有in ê保護者，有in ê天使。
將近80年前出世佇阿里山玉山邊仔ê我，經過世間各地ê流浪，chit-má來到Seattle，兩个翁仔某牽手佇這个異鄉，想起長長ê過去，我嘛袂當為上帝做啥物工。阮ê囡仔攏結婚生囝，一人一家代。Chit-má著掛慮ê代誌是今後，只有祈禱上帝來hō͘世間khah平等，祈禱上帝hō͘咱有目睭，看khah遠、khah清ê世界。
