Chhiáⁿ an-chong NunitoPOJ jī-hêng, phòe-ha̍p Firefox Browser lâi tha̍k.
請安裝NunitoPOJ字型，配合Firefox瀏覽器來讀
◎李南衡
福伯問我：「你敢bat聽過『放屎拾tio̍h柴刀。（Pàng-sái khioh tio̍h chhâ-to.）』chit句台灣俗語話？」我應講：「M̄ bat。Chit句台灣俗語話是啥物意思？」福伯解說講：阮故鄉桃園是一个丘陵地，真濟無蓋懸ê細粒山，山頂大部分是相思仔hit類ê雜木仔，有ê樹椏hō͘雷公拍斷，有ê樹欉hō͘風吹倒去。台灣早前猶無瓦斯ê時代，庄跤人頭喙濟，攏是大鼎大灶煮食，用野草抑是稻草縛作草絪起火，才用大細枝柴枝焚火。所以tio̍h定定去山頂四界剉柴、拾柴。有夠一个份量才縛縛leh擔落山轉來厝裡。一般攏是kā歸綑柴phēng teh gîm-chîⁿ（砛簷）跤ê壁邊，出在風吹日曝，等khah乾才一枝一枝斬作短節thang long入去灶孔。有一个人去山頂剉柴，忽然間腹肚滾絞beh放屎，柴刀隨便匟佇路邊，緊去樹跤放屎。放屎了，kiâⁿ出來路邊看tio̍h一枝柴刀，歡喜一下講：『放屎拾tio̍h柴刀，有夠好運。』伊剉柴了，kā柴枝縛好勢beh擔落山轉去，行到樹仔跤無意中踏tio̍h一pû屎，足受氣，大聲罵講啥人chiah呢無體統，烏白佇山頂放屎！」
聽歸晡，我緊問福伯：「Chit句台灣俗語話是beh講啥？」福伯講：「Chit句俗語話是講一个無頭神ê人，拾tio̍h抵chiah家己匟佇路邊ê柴刀足歡喜，踏tio̍h抵chiah家己放ê屎罵人罵kah大細聲。」我應講：「是按呢哦？你到底是teh講啥人？」福伯笑kah哈哈叫講：「猶有啥人？我是teh講台北市前市長柯文哲。福伯講：「你有注意tio̍h抑無？七月初十新聞報導講，初九暗台灣民眾黨總統參選人、柯文哲前市長講：『我原本拍算beh佇台北流行音樂中心辦賣票演唱會，但是世態炎涼，卸任市長才三个月，“人”tio̍h無beh hō͘咱辦。』台北市長蔣萬安有kā伊回話講：『台北流行音樂中心規定bē使辦政治性活動，是柯市長任內所定ê規則』；台北市文化局長蔡詩萍mā kā柯主席酸一下講：『柯主席bē記得柯市長ê承諾』；『北流』特別強調講：『Chit ê所在是流行音樂場域，無適合舉辦政治活動。』代誌若干單按呢，會使解說講是柯主席記持無好。問題出佇柯主席出嘴罵人講：『通常chit種代誌，太監tio̍h解決掉，bē到皇上hia去。』隨時引起紛紛ê議論：是按怎現代人滿頭殼封建ê用語？是按怎訂法ê人罵執法ê人是太監咧？七月初十，柯文哲ê子弟兵、台北市議員林珍羽佇面冊發文講：『向台北市優秀ê八萬大軍道歉』，老實講『阿北（指柯文哲）』比喻用詞無適當，公開致歉。事後傳出柯文哲為chit件代誌大受氣，柯文哲指出，按呢講那像我m̄敢面對，hō͘別人出來講、我才無愛。罵林珍羽一頓，koh質疑林珍羽替伊道歉是teh『疊懸家己』。林珍羽實在有夠衰！」
