Chhiáⁿ an-chong NunitoPOJ jī-hêng, phòe-ha̍p Firefox Browser lâi tha̍k.
請安裝NunitoPOJ字型，配合Firefox瀏覽器來讀
◎Lîm Jū-jîn
Hoat-lī-sài lâng beh chhì-thàm Iâ-so͘, mn̄g i “tiōng-hu lî i ê bó͘ ha̍p-hoat bô?” Iâ-so͘ piáu-sī Mô͘-se sī in-ūi lâng sim ngī chiah ún-chún lâng siá lî-hun-su chiū thang lî i ê bó͘ (Má-khó 10:2-5). Chhin-chhiūⁿ hiān-tāi lâng leh kóng ha̍p-hoat chí-sī siōng-kē ê phiau-chún. Iâ-so͘ bô hó͘ⁿ-jīn lî-hun ê ha̍p-hoat-sèng, siâng-sî mā piáu-bêng lî-hun m̄-sī hó tāi-chì.
Sèng-keng chóaⁿ-iūⁿ kóng lî-hun
Má-la̍h-ki 2:16, Siōng-tè án-ni kóng, “Góa thó-ià lî-hun. Góa thó-ià lín tiong-kan ū lâng tùi ka-kī ê bó͘ chòe chi̍t-khoán chân-jím ê tāi-chì.” Má-la̍h-ki ê kà-sī khah giâm-lē, tông-sî mā hián-chhut kah hiān-tāi bô-kâng ê pōe-kéng. Hiān-chú-sî khah bô lâng ti̍t-chiap jīn-tēng lî-hun sī tùi lú-hong chòe-chhut chân-jím ê tāi-chì. Tī Kū-iok kah Iâ-so͘ ê sî-tāi, tú-tio̍h bô bí-boán ê hun-in ū pí lî-hun koh khah oân-boán ê chhú-lí hong-sek.
Sin-bēng-kì 21:15-17 kóng tio̍h lâng ū nn̄g ê bó͘, chi̍t ê khah ài, chi̍t ê khah bô ài, tio̍h ài chóaⁿ-iūⁿ hun-phòe châi-sán ê būn-tê. Chit ê lu̍t-hoat kóng lâng ū nn̄g ê bó͘ sī lu̍t-hoat ún-chún–ê. Koh khah tiōng-iàu ê kà-sī sī ài kong-pîⁿ tùi-thāi só͘ ài kah khah bô ài ê bó͘. Má-la̍h-ki 2:14 ē kóng hiah-nī giâm-lē ê ōe “Sī in-ūi lí ū pōe-poān lí siáu-liân ê sî chhōa ê bó͘.”
Kì-jiân hit ê sî-tāi ê lâng ē-tàng chhōa nn̄g ê sīm-chí koh khah chē ê bó͘, jî-chhiáⁿ hit ê sî-tāi hō͘ lâng lî-hun ê hū-jîn-lâng sī pi-chhám–ê, cha-po͘-lâng thài tio̍h soán-te̍k lî-hun lâi tek-chōe Sióng-tè? Lēng-gōa chhōa kà-ì ê bó͘, ha̍p-lí ê tùi-thāi bô kah-ì ê bó͘, kiong-èng i chia̍h-chhēng, án-ne kám m̄-sī khah oân-boán?
Má-thài 22:23-32 kì-chài Sat-to͘-kai lâng mn̄g Iâ-so͘ koh-oa̍h ê būn-tê. In ēng lu̍t-hoat ê kui-tēng “ū lâng bô siⁿ-kiáⁿ chiū sí-khì, sió-tī tio̍h chhōa hiaⁿ-só thòe hiaⁿ-ko thoân-chong chiap-tāi”. In iōng “liân-sòa chhit ê hiaⁿ-tī chhōa bó͘ liáu-āu bô siⁿ-kiáⁿ chiū kòe-sin” ê lē lâi mn̄g Iâ-so͘. Chit tōaⁿ keng-bûn tiōng-tiám sī kóng koh-oa̍h ê tāi-chì. Tān-sī Iâ-so͘ bô piáu-sī I hoán-tùi chit tiâu khó-lêng ē kiông-pek lâng chhōa kúi-nā ê bó͘ ê lu̍t-hoat. Mā ē-tàng kóng tī tang-sî ê siā-hōe, Iâ-so͘ ún-chún lâng chhōa kúi-nā ê bó͘.
Koan-hē lî-hun ê lu̍t-hoat ū an-ne kóng: “Nā ū lâng chhōa-bó͘ liáu-āu, chai bó͘ ū kiàn-siàu-sū, bô ài–i, chiū thang siá lî-hun-su hō͘–i, kiò i lī-khui.” (Sin-bēng-kì 24:1) Lu̍t-hoat bô kóng chheng-chhó siáⁿ-mi̍h kiò-chòe “kiàn-siàu-sū”. Án-ne, chit tiâu lu̍t-hoat ū kóa chhin-chhiūⁿ khang-pe̍h ê chi-phiò, kù-chāi í-keng chhōa-bó͘ ê ta-po͘-lâng chiàu i ka-tī ê siūⁿ-hoat kái-sòe. Mā ē-tàng kóng ta-po͘-lâng chhìn-chhái chhōe chi̍t ê lí-iû chiū ē-tàng lî-hun.
Tiong-kok kó͘-chá-sî chóaⁿ-iūⁿ kóng lî-hun
Tiong-kok kó͘-chá-sî mā-sī án-ne, ta-po͘-lâng ē-tàng chhōa kúi-nā-ê bó͘. Ū chhit-hāng chōe-miâ thang chiâⁿ-chòe ta-po͘-lâng siá lî-hun-su kā thài-thài lî-hun ê lí-iû. Bô iú-hàu ta-ke-koaⁿ, chit ê goân-im khó-lêng khah ē-tàng hō͘ lâng chiap-siū. Bô siⁿ-kiáⁿ, chit khoán khó-lêng sī ta-po͘-lâng ê būn-tê mā chiâⁿ chòe ta-po͘-lâng soán-te̍k lî-hun ê lí-iû. Kóng êng-á-ōe kah oàn-tò͘, chit khoán tāi-pō͘-hūn lâng chē-chió lóng ū ê mô͘-pēⁿ iā sī lî-hun ê lí-iû. Án-ne kám m̄ sī chhut-chāi ta-po͘-lâng siūⁿ beh lî hun, chhìn-chhái tō ē-tàng chhōe tio̍h ha̍p-hoat ê lí-iû? Hiān-tāi siā-hōe khióng-kiaⁿ–á bô lâng ē chi-chhî chit khoán hō͘ lâng chhìn-chhài bóng-iōng ê lî-hun chè-tō͘.
Iâ-so͘ tùi hun-in ê koan-tiám kap kàu-tō
Hiān-tāi siā-hōe tiōng-sī lâm-lú pêng-koân. Ta-po͘-lâng kan-ta ē-tàng chhōa chi̍t ê bó͘. Lî-hun mā bô-koh-sī ta-po͘-lâng tan-hong-bīn koat-tēng tio̍h chún-sǹg. Beh lî-hun tio̍h lâm-lú siang-hong kóng-hó-sè. Nā-bô, tio̍h ài cháu hoat-īⁿ, hō͘ hoat-koaⁿ lâi phòaⁿ-tēng. Lî-hun ê cha-bó͘-lâng mā bô chhin-chhiūⁿ kó͘-chá hiah-nī pi-chhám.
Tī Iâ-so͘ hit ê sî-tāi, kàu-hōe kám tio̍h chiap-la̍p lî-hun ê Ki-tok-tô͘? Iâ-so͘ tùi hun-in ê li̍p-tiûⁿ sī “lâng ōe lī-khui i ê pē-bú, kap i ê bó͘ kiat-ha̍p, nn̄g lâng chiâⁿ-chòe chi̍t-thé” (Má-khó 10:7, 8). Iâ-so͘ koh kóng “Siōng-tè só͘ phòe-ha̍p ê, lâng m̄-thang thiah-khui.” (Má-khó 10:9) Sui-jiân sî-tāi bô-kâng, chè-tō͘ mā bô-kâng, chóng–sī Siōng-tè ê sim-ì sī bōe kái-piàn–ê.
Nā-chún hun-in seng-oa̍h bô bí-boán, sīm-chí ang-á-bó͘ hō͘-siong siong-hāi, lâng kám ē-tàng chek-koài Siōng-tè sī an-chóaⁿ phòe-ha̍p chiah-nih bô hó ê tùi-siōng? Nā kóng hit khoán ê hun-in sī lâng ê soán-te̍k m̄-sī Siōng-tè phòe-ha̍p–ê, kéng m̄-tio̍h kám bē-sái hoán-hóe? Tī it-hu-it-chhe chè-tō͘, bô khó-lêng î-chhî goân-lâi ê hun-in koh siâng-sî lēng-gōa koh chhōa. Lî-hun ū tang-sî-á piàn-chiâⁿ î-it ē thang kái-koat hun-in būn-tê ê soán-te̍k.
Ko-lîm-to chiân-su 7:12-15, Pó-lô kóng i chiap-siū lî-hun ê chi̍t-kóa chêng-hêng. Iā chiū-sī kóng, Pó-lô m̄-sī oân-choân bē chiap-siū Ki-tok-tô͘ lî-hun. Pó-lô koh kóng, “Í-keng chhōa-bó͘, m̄-thang siūⁿ-beh chū-iû; iáu-bē chhōa-bó͘, m̄-thang siūⁿ-beh chhōa.” (1 Ko-lîm-to 7:27) Chia só͘ kóng ê “chū-iû” tùi chiàu Ko-lîm-to chiân-su 7:39, chiū chai-iáⁿ sī leh kóng kiat-sok hu-chhe koan-hē, iā chiū sī “lî-hun”. Chāi góa khòaⁿ, Pó-lô ê ì-sù sī kóng siūⁿ-beh kiat-hun kah siūⁿ-beh lî-hun lóng kâng-khoán bô-hó. Ki-tok-tô͘ kiû Siōng-tè an-pâi ha̍h-su ê tùi-siōng lâi kiat-hun, lán sù-siông khòaⁿ chòe bí-sū. Siong-tùi, Ki-tok-tô͘ siūⁿ beh lî-hun, sīm-chí kiâⁿ lî-hun ê lō͘, lán siōng-bô mā tio̍h chiap-la̍p. Kám m̄-sī án-ni?
Lî-hun sī bái ê soán-te̍k. In-ūi lî-hun, ū lâng bē-tàng kah kiáⁿ-jî tàu-tīn seng-oa̍h, mā ū lâng in-ūi án-ni lâi phò-sán. Che lóng-sī ûi-hām ê tāi-chì. Hōe-iú tiong-kan nā ū lâng ko͘-put-jī-chiong tio̍h lî-hun, lán kám bô eng-kai hō͘ in khah chē ê chi-chhî kap koan-hoâi?
Bô-lūn chóaⁿ-iūⁿ, lî-hun lóng m̄-sī hó tāi-chì. Kiat-hun chêng tio̍h siūⁿ hō͘ hó, soán hō͘ tio̍h. Chhian-bān tō ài pī-bián kiâⁿ chiūⁿ lî-hun ê lō͘.
