Chhiáⁿ an-chong NunitoPOJ jī-hêng, phòe-ha̍p Firefox Browser lâi tha̍k.
請安裝NunitoPOJ字型，配合Firefox瀏覽器來讀
◎Ông Bí-su
Lâng éng-éng chin ū chhù-bī tī ka-kī ê chhut-sin, siūⁿ beh chai-iáⁿ chó͘-sian ê tāi-chì; nā ē tàng chhōe-tio̍h lú kó͘-chá ê chu-liāu lú hó. Cho̍k-phó͘ chiong lán pún-sin kah lán ê kun-goân kiat-liân–khí-lâi, kā lán khǹg tī koh khah khui-khoah ê le̍k-sú tiong, hō͘ lán sio̍k tī kòe-khì ê bó͘ chi̍t ê ka-cho̍k, khiā-khí tī bó͘ chi̍t ê siā-khu–ni̍h. Chhōe cho̍k-phó͘ ê tōng-ki khó-lêng sī chhut tī beh chai-iáⁿ ka-cho̍k ê lú-thêng, he̍k-sī khì chhōe kong-êng ê thoân-thóng lâi bīn-tùi hiān-chhú-sî ê thiau-chiàn. Mā ū khó-lêng sī ūi-tio̍h beh tit-tio̍h lī-ek, thang chú-tiuⁿ ka-kī pí pa̍t lâng khah iu-siù á-sī hiat-thóng khah ko-kùi.
Nā án-ne, lán beh án-chóaⁿ khòaⁿ Lō͘-ka 3:23-38 só͘ siá ê Iâ-so͘ ê cho̍k-phó͘ leh? I ê tōng-ki sī sím-mi̍h? Lán ài tùi Lō͘-ka ê chú-iàu su-sióng lâi liáu-kái. I siá cho̍k-phó͘ kap i ê chú-iàu sìn-sit sī liân chòe-hóe–ê. Che sī i khí-chō “Iâ-so͘ sī Siōng-tè ê kiáⁿ” ê hong-hoat, mā sī Lō͘-ka siá Ki-tok cho̍k-phó͘ ê siōng bóe ê bo̍k-phiau; Iâ-so͘ sîn-sèng ê khí-goân kap kiù-un sī bô hoat-tō͘ hun-koah–ê. Chit ê cho̍k-phó͘ kóng Iâ-so͘ sī Siōng-tè ê kiáⁿ, piáu-bêng I tī kiù-un le̍k-sú tiong ê kak-sek.
I sī Siōng-tè ê kiáⁿ mā sī A-tong ê kiáⁿ. I sī lâng ê kiáⁿ, hián-bêng Tō chiâⁿ-chòe jio̍k-thé: Iâ-so͘ sio̍k tī Siōng-tè, hō͘ Siōng-tè só͘ chhe-khián. Tī Iâ-so͘ lāi-bīn ê Siōng-tè, sêng-tam jîn-lūi ê phò-chhùi kap siū-khó͘, chín-kiù jîn-lūi kap it-chhè siū-chō–ê.
Iâ-so͘ sī kū-thé ê lâng, m̄ sī thiu-siōng ê koan-liām. Só͘-í lán tâm-lūn koan-hē Iâ-so͘ ê tāi-chì ê sî, beh lūn–ê m̄ sī lâng tàu-té sī siáⁿ-mi̍h, mā m̄ sī lâng ê thong-lūn á-sī it-poaⁿ ê tì-sek. Iâ-so͘ ū ka-têng, sio̍k tī bó͘ chi̍t ê cho̍k-kûn; khiā-khí tī chi̍t ê só͘-chāi, ū tē-lí khu-he̍k, bûn-hòa kap le̍k-sú. Iâ-so͘ sī oa̍h-oa̍h ê lâng, bat chhut-sì tī Pa-le̍k-su-thêng (Palestine), pē-bú sī Iok-sek kap Má-lī-a; I ūi Siōng-tè chòe kan-chèng, I kán tek-sit hit sî ê chong-kàu kap chèng-tī thé-hē; in-ūi án-ne, hông hāi–sí. Iâ-so͘ oa̍h tī Lô-má tè-kok si̍t-bîn thóng-tī ê nî-tāi, I tùi-khòng tè-kok, tì-sú hō͘ tè-kok ê sè-le̍k thâi–sí.
Lō͘-ka ê cho̍k-phó͘ khak-li̍p Iâ-so͘ ê siang-têng sin-hūn: sîn-sèng (Siōng-tè ê kiáⁿ) kap jîn-sèng (A-tong ê kiáⁿ). Che sī sîn-ha̍k ê ki-chhó͘; soeh-bêng ‘sîn-sèng kap jîn-sèng, chhiau-oa̍t kap pún-chit, lêng kap bu̍t-chit, phó͘-sè kap pún-tē’ téng-téng ê chú-tê. I hō͘ lán khòaⁿ-tio̍h tī ‘te̍k-pia̍t, jîn-kan, seng-oa̍h’ ê tiong-kan, lán m̄-bián hoân-ló ē sit-lo̍h ‘sîn-sèng, chhiau-oa̍t, úi-tāi kap phó͘-sè’. Lán ē tàng khòaⁿ-tio̍h tī chit sè-kan tiong ū sîn-sèng; tī iú-hān ê pún-chit tiong ū chhiau-oa̍t-tek; tī pún-tē tiong ū phó͘-sè; tī sùn-kan tiong ū éng-oán; tī thô͘-hún tiong ū ú-tiū. Iú-hān kap chhiau-oa̍t m̄ sī tùi-li̍p–ê, iú-hān-tek ū chhiau-oa̍t ê Siōng-tè lîm-chāi. Iú-hān-tek sī chhiau-oa̍t ê lēng-gōa chi̍t bīn. Nā sī ū chi̍t ê mi̍h-kiāⁿ sī phó͘-sè–ê, i mā choa̍t-tùi ē kū-thé tián-hiān tī hiān-chhú-sî. Che sī Siōng-tè kiù-un ê tō-lí, sī Tō chiâⁿ-chòe jio̍k-thé ê he̍k-sim. Siōng-tè ê thiàⁿ thong-kòe kū-thé ê lâng kap tāi-chì lîm-kàu sè-kan.
Thó-lūn
1.Lí sī án-chóaⁿ jīn-bat Chú Iâ-so͘–ê? Lí ê ka-cho̍k kap Siōng-tè ê kiù-un ū siáⁿ koan-hē?
2.Lí ē chóaⁿ-iūⁿ siá kiù-un ê cho̍k-phó͘?
