Chhiáⁿ an-chong NunitoPOJ jī-hêng, phòe-ha̍p Firefox Browser lâi tha̍k.
請安裝NunitoPOJ字型，配合Firefox瀏覽器來讀
◎李南衡
福伯感慨講：「咱台灣人實在siuⁿ過tiōng禮數。前幾工我去參加一个宴會，差不多慢十分鐘。我看酒杯雖然酒酙好勢，第一齣菜都猶袂上桌，那像猶袂有人lim酒。一下看我到位，逐个hoah講：『慢來罰三杯』。我笑笑講：『罰一杯敢bē使？』koh講：『慢來罰三杯原本ê意思是，眾人lim一睏你才來，驚你lim siuⁿ少、無公平，才講罰三杯。Taⁿ都猶袂有人lim酒，是按怎tio̍h一定罰三杯咧？我飲一杯kā逐个會失禮。』眾人搖手hoah講：『Bē-sài！無三不成禮。（bû sam put sêng lé .）』」
福伯講，「無三不成禮」chit句台灣俗語佇台灣根釘了真深。咱去參加親友ê追思會，有喪家考慮tio̍h親友ê宗教信仰，一律無giâ香祭拜改作向遺像行禮，一般攏是三鞠躬行三個禮。像講台灣ê民間信仰，過年過節祭拜ê時，上基本tio̍h準備三牲酒禮。三牲是三層豬肉一liau、全雞一隻（有頭有尾有跤有翅）、全魚一尾。我問講福伯那會講「無三不成禮」chit句台灣俗語？
福伯講，伊看最近中國國民黨舊症頭koh發。2010年11月底，中國國民黨朱立倫贏tio̍h台北縣升格作新北市ê頭一任市長，2014年11月競選新北市長連任成功。猶無一年ê 2015年10月17日，朱立倫làu-phâu去選2016年ê總統，得381萬3365票、得票率31.04%，大輸民進黨蔡英文ê 689萬4744票、得票率56.12%。2019年1月24 ê九合一選舉，中國國民黨韓國瑜以89萬2545票、拍贏民進黨高雄市長候選人陳其邁，五個月後ê 2019年6月初5，韓國瑜市長表態願意被動徵召拚中國國民黨總統初選，伊初選選贏代表中國國民黨參加2020年總統選舉。10月16日，正式làu-phâu向高雄市政府請假，全力投入總統選舉。2
020年1月11，總統選舉韓國瑜 tit-tio̍h 552萬2119票，得票率38.61%，大輸民進黨蔡英文 tit-tio̍h 817萬231票，得票率57.13%。上蓋衰ê是總統落選，2020年6月初6，高雄市民以93萬9090張同意票罷免韓國瑜市長。Koh khah無面子ê是，伊hông罷免ê票數比一年前當選ê票koh khah濟4萬6545票。2018年11月24，中國國民黨侯友宜拍贏民進黨ê蘇貞昌，當選新北市第3屆市長。2022年11月26日，koh拍贏民進黨林佳龍順利連任。無半年，侯友宜決定beh làu-phâu代表中國國民黨參選2024年總統大選。福伯講，中國國民黨已經有兩个現任直轄市長làu-phâu去選總統落選，侯友宜koh仝款按呢làu-phâu，市民當然會真受氣用選票kā教示，所以伊一定會落選，m̄ chiah講「無三不成禮」。我笑笑講，福伯若預測有準，以後我尊稱你「半仙伯」。
「無三不成禮」chit句台灣俗語話，那像猶會koh傳落去。
