Chhiáⁿ an-chong NunitoPOJ jī-hêng, phòe-ha̍p Firefox Browser lâi tha̍k.
請安裝NunitoPOJ字型，配合Firefox瀏覽器來讀
Chù: Chit phiⁿ sī hôe-èng 3747 kî ê “Kiù-un ê cho̍k-phó͘ ”, tha̍k Lō͘-ka 3:23-38 ê kám-sióng.
◎N̂g Kùi-lân
Tē１tāi
Khó͘ Chhâng (gōa-kong)
Gōa-kong seⁿ kài chē ê, io bē tōa, sûi-ê-á phah-sńg–khì. I bē kham-tit táⁿ-kek, lo̍h-bóe chheh-sim, chhōa thong-ke lâi sìn Iâ-so͘, tī Pîn-tong kàu-hōe iû 許有才(Khó͘ Iú-châi) bo̍k-su kā choân-ke tōa-sè kiâⁿ sé-lé. Ta̍k lé-pài in ùi Kui-lâi chng kiâⁿ khì Pîn-tong kàu-hōe chū-hōe; 1 chōa lō͘ beh 3 kong-lí.
Tē２tāi
Khó͘ Goa̍t-lí (tōa-î ),
Khó͘ Thian-sù (tōa-kū, bô sìn),
Khó͘ Goa̍t-hōng (a-bú)
Tōa-î kap a-bú chha 15 hòe. Góa sè-hàn ê sî, i tiāⁿ-tiāⁿ lâi goán tau kóng Iâ-so͘ ê kò͘-sū. Kiàn-nā lâi, lóng hō͘ a-pa kā kóaⁿ–chhut-khì. M̄ koh tī góa sim-lāi lâu-lo̍h thiⁿ-sài kap Iâ-so͘ ê ìn-siōng.
Gín-á sî, goán tau ê chàu put-sî chhiàⁿ lâng lâi sóa-tang sóa-sai. Kóng sī hong-súi m̄ tio̍h, tì-sú lāu-bú lám-sin, tiāⁿ-tiāⁿ ūi-tio̍h i-io̍h-hùi tio̍h-bôa; ang-bó kám-chêng bē hô; a-pa (N̂g Ōng-chú) khah án-chóaⁿ péng-pìⁿ to thàn bô chia̍h.
A-bú 3 hòe siū iù-jî sé-lé; bô kúi tang, gōa-má to̍h kòe-sin ah, chhù-lāi chhun gōa-kong kap a-bú. Gōa-kong nî-lāu ê sî, khòa-lū i sí liáu-āu cha-bó͘-kiáⁿ ē bô i bô óa, chiū kā bōe móa 18 hòe ê a-bú kín chò–lâng. A-bú kè-liáu, tòe a-pa pài ngó͘-siōng; ta̍k sian sîn pài liáu-liáu, liân kúi iā pài; chóng–sī iû-goân bô hoat-tō͘ kái-piàn i jîn-seng ê khó͘-thàng; chū án-ne chheh-sim. I siūⁿ-khí i iáu ū chi̍t ê Sîn. 1995 nî, i ka-kī chông–ji̍p-khì kàu-hōe, kóng beh sìn Iâ-so͘; kàu-hōe hiaⁿ-tī chí-bē jia̍t-sim chiap-thāi–i. A-bú khat-bō͘ ho̍k-im, sim-lāi hí-lo̍k; tit-kiù í-āu jîn-seng ùi o͘-pe̍h piàn chhái-sek–ê.
A-pa khiok hoán-tùi a-bú lâi sìn, sam-put gō͘-sî kā phah kah o͘-chheⁿ kek-hoeh; sīm-chì tī lō͘–ni̍h kā cháng lo̍h-lâi chàm, kòe-lō͘ lâng iā m̄ káⁿ óa lâi chiàm. A-pa kóng a-bú ‘pōe-kàu, kong-má m̄ pài, kà-pháiⁿ gín-á tōa-sè.’ A-bú jú siū pek-hāi jú ū sìn-sim; kui sì-lâng ūi kiáⁿ-jî kî-tó, bāng in lâi sìn Chú. I tē it iàu-ì–ê sī : ūi ban-á-kiáⁿ kiû 1 ê sìn Chú ê lú-chú chò bó͘; a-bú kā Siōng-tè kóng, Góa í-keng ū nn̄g ê bī sìn Chú ê sim-pū ah, ǹg-bāng ū sìn Chú ê sim-pū lâi ín-chhōa ban-á-kiáⁿ. Siōng-tè èng-ún i ê kî-tó. A-bú kap sió-tī in hu-hū chò-hóe tòa siōng kú, kám-chêng siōng hó.
Tē３tāi
N̂g Bêng-goân (tōa-hiaⁿ bô sìn),
N̂g Kùi-eng (a-chí),
N̂g Sèng-lī (jī-hiaⁿ),
N̂g Kùi-lân (góa),
N̂g Sèng-châi (sió-tī) ,
Ngô͘ Chhiu-mûi (tē-hū)
Sè-hàn ê sî a-pa siōng ài chhōa góa khì chia̍h chheⁿ-chhau, bô lūn hun-song á-sī biō-hōe lāu-jia̍t. A-pa kà góa án-chóaⁿ pài-pài. M̄ koh kiàn-nā khòaⁿ he biō–ni̍h ê chhit-iâ peh-iâ, pat-ka-chiòng, o͘-bīn má-chó͘, góa lóng m̄ káⁿ gia̍h thâu khòaⁿ; iû-kî nā tn̄g-tio̍h ngiâ-lāu-jia̍t ê tūi-ngó͘ to̍h kín siám, koh ē chò ok-bāng. Kàu taⁿ nā tú-tio̍h ngiâ-lāu-jia̍t, góa iû-goân ē siám tùi pa̍t-tiâu lō͘ khì.
1977 nî, Tōa-î iau-chhiáⁿ góa khì Bîn-hô kàu-hōe. Góa siōng thâu-á ê kám-kak sī: “kàu-hōe lāi-té bô siáⁿ, kan-nā si̍p-jī-kè kap toh-ā í-á, bô lâng (hit kang m̄ sī lé-pài-ji̍t); m̄ kú ná ē chiah-nih-á hô-hâi, chheng-khì-siùⁿ? Tōa-î chhōa góa khì chheng-siàu-liân thoân-khè; kám-kak hia ê khì-hun kap chhù–ni̍h bô kâng; án-chóaⁿ bô kâng? Hiòng-sî mā bē hiáu kóng. Chū án-ne góa to̍h m̄ bat lī-khui Siōng-tè. Bô-lūn khì kàu tó-ūi, tē it iáu-kín–ê to̍h-sī chhōe kàu-hōe. Boán 18 hòe, góa to̍h siū sé-lé; pí a-bú khah chá 18 nî.
Góa tâⁿ lâi Tâi-pak ê sî tī Chhiah-hong-ke tiúⁿ-ló kàu-hōe chū-hōe. Khah te̍k-pia̍t–ê sī tī Tâi-pak 以琳 chheh-pâng ê chi̍t ê O͘-khek-lân ê (hit chūn iáu sī kiò So͘-liân lâng) ji̍p Ka-ná-tāi chek ê 柯希能 bo̍k-su khai-chhòng ê kàu-hōe, i kā góa chìm-chúi sé–ê, góa iā bat tī Bûn-lo̍k (門諾) kàu-hōe tng chip-sū, iā bat khì Lêng-liông tông, ti̍t kàu kè ang chiah koh tńg-lâi tiúⁿ-ló kàu-hōe. Kè ji̍p-khì sìn Chú í-keng 5 tāi ê ka-cho̍k; ang-sài in ka-cho̍k ê lâng lóng jia̍t-sim tī kàu-hōe.
A-bú sìn Chú í-āu, goán ke chiok ū ōe kóng–ê; sî-siông thong tiān-ōe, ūi chhin-lâng kî-tó. Jī-hiaⁿ kap sió-tī ke kiám ē tòe a-bú khì chò lé-pài.
Jī-hiaⁿ ài peh soaⁿ; tō-lí thiaⁿ 10 tang liáu, tī 2005 nî ê tiong-chām khì peh soaⁿ ê sî, khòaⁿ-kìⁿ hûn-ang, sim-lāi tín-tāng; kám-kak chin-chiàⁿ ū Siōng-tè ê chûn-chāi. Lo̍h soaⁿ liáu-āu, i sûi kā a-bú kóng beh niá sé-lé.
A-chí kap góa lóng chió hòe to̍h lâi Tâi-pak. Chū sè-hàn goán kám-chêng to̍h chiok hó–ê; ín-chhōa i lâi sìn Chú sī kai-tong-jiân–ê; chóng–sī a-chí m̄-nā bô sìn, sīm-chí kui-i Pu̍t-kàu. Kin-nî 6 goe̍h i jiám-tio̍h giâm-tiōng ê COVID-19, hoat-sio lóng bē thòe. Tng sìⁿ-miā gûi-kip bû-chō͘ ê sî, i tó tī pīⁿ-chhn̂g beh ho͘-kiò tó 1 ê sîn? Nā beh Pu̍t-kàu–ê tio̍h chhiáⁿ kúi-nā chun; bô, kui-khì 1 ê Siōng-tè khah kán-tan. A-chí to̍h hoah “ Chú ah! Kiù–góa ”. I ê thé-un chiū kàng–lo̍h-lâi. Koh tng i teh tōa hoat-sio ê sî, kám-kak ū 1 ê chhēng nâ-sek saⁿ ê hō͘-lí-su sian-siⁿ, lâi kā i ōaⁿ peng-chím, thîn tê ho͘ lim. Kàu i bô koh hoat-sio, chiū ti̍t-ti̍t beh chhōe hit ê hō͘-lí-su sian-siⁿ; mn̄g–lâng, lâng mā kóng bô chit ê lâng. A-chí kám-siū-tio̍h sī thiⁿ-sái teh siú-hō͘–i. I khà tiān-ōe hō͘–góa, kóng, “ Chhiáⁿ lí ūi góa kî-tó ”. Góa to̍h chhōa i koat-chì. I siūⁿ kóng chit táu khióng-kiaⁿ-á sī kiâⁿ bē chhut pēⁿ-īⁿ ah, chiū kā ûi-giân ûi-su lóng chhoân-piān; koh siūⁿ beh chhiáⁿ bo̍k-su lâi pēⁿ-īⁿ kā sé-lé. Góa kóng, góa tī kî-tó tiong ū pêng-an, lí choa̍t-tùi thang kiâⁿ-chhut pēⁿ-īⁿ. 2023 nî 7 goe̍h 28, a-chí tī Ka-lâm kàu-hōe niá sé-lé.
Sió-tī chū chhōa sìn Chú ê tē-hū-á liáu-āu, to̍h pī-pān sim beh lâi sìn. Sui-jiân iáu khòa-lū a-pa ê sîn-chú-pâi-á, chóng–sī i niá sé-lé sī chá-bān ê tāi-chì. In kiáⁿ, nn̄g-ê lóng ū siū iù-jî sé-lé.
Chiah-ê tāi-chì liáu-āu, a-chí hoan-thâu khì siūⁿ, kóng, Tōa-î tī lán sè-hàn ê sî to̍h iā hok-im ê chí hō͘–lán ah.
