Chhiáⁿ an-chong NunitoPOJ jī-hêng, phòe-ha̍p Firefox Browser lâi tha̍k.
請安裝NunitoPOJ字型，配合Firefox瀏覽器來讀
◎A-tiân
Téng-kang tī chhài-chhī-á bé pe̍h-tòa-hî, sūn-sòa kā thâu-ke ài kúi-lia̍p-á pe̍h-tòa-hî-thâu. Thâu-ke mn̄g góa kóng: “Sī lí beh chia̍h, ā-sī beh chhī-káu…?” Góa sim-koaⁿ chin chū-jiân ka hôe-tap sī góa beh chia̍h ê .
Pe̍h-tòa-hî ê chhùi chiam-chiam, chhùi-khí chin-lāi, ē-sái kóng ta̍k-pái giah-chhì, ta̍k-pái chńg-thâu-á kha̍p-tio̍h chhùi-khí, bô chi̍t kái bô lâu-hoeh, he nā-sī beh chhī niau-á á-sī káu-á, kiám ū-iáⁿ bōe chha̍k-phòa in ê tn̂g-á-tó͘?
Góa chhin-chhiūⁿ niau ài chia̍h hî-thâu. Góa kā pe̍h-tòa-hî-thâu ê pe̍h-ian khau hō͘ chheng-khì, lo̍h chi̍t-tiám-á iâm-hoe-á kah bí-chiú, khui sió-hóe ka chian hō͘ chhiah-chhiah to-ē phang-kòng-kòng .
Góa lóng seng chia̍h chhùi-phé-bah, chiah koh chhńg ba̍k-chiu, che pí chia̍h pe̍h-tòa-hî-sin khah ū chu-bī .
M̄-káⁿ chia̍h thâu, bē-hiáu chhńg-chhì ê lâng, ná-ē chai giàn-thâu saⁿ-hun-pó͘ chit-ē jîn-kan hó-chu-bī leh.
