◎翁博文
十二使徒咱攏知 出賣耶穌是猶大
三十兩銀 ê 代價 就將耶穌來出賣
客西馬尼主慘慼 三遍祈禱求天父
苦杯若是著要接 願成天父聖旨意
猶大唚主做暗號 兵丁攑槌閣攑刀
半暝掠主到公會 想欲將主定死罪
透暝受審咱 ê 主 一官府過一官府
一所在過一所在 想欲將主來迫害
主受鞭拍被呸涎 戴莿冕旒流血汗
主受凌辱閣戲弄 閣被蘆竹捽頭殼
主受恥笑閣詈罵 透暝受審無通坐
肩揹沉重十字架 無力通夯頓 lap 坐
跋倒一遍閣一遍 勉強閣行腳步 hián
十字架頂主被釘 豎佇各各他山頂
大聲喉叫主斷氣 十字架頂流寶血
主流寶血救贖咱 替咱受苦到此款
數念主救贖功勞 雙手釘跡做記號
著緊為主做見證 導萬人做主學生
（作者為基督徒）
