做一个母語作家 是人生上好 ê 投資

(請安裝Taigi Unicode字形,配合Firefox瀏覽器來讀)

作者:歹銅舊錫

有一本冊叫做《寫作是最好的自我投資》,內底有講著袂少現此時人按怎看「寫作」chit 項代誌,親像提升自知度、影響別人,按怎做,會面對著啥物困難,落尾成功趁錢……等等。這是一本予對寫作有趣味 ê 人真好 ê 指導 kap 方向 ê 冊。冊寫了真淺白,咱有志想欲用母語來寫 ê 人,更加愛來讀。是講我 m̄ 是干焦欲推 chit 本冊予咱有志 niā-niā。因為咱有 koh-khah 大 ê 野心,「做一个母語作家是人生上好 ê 投資」。
人生上好 ê 投資,因為寫母語是少數人 ê 堅持 kap 驕傲 ah。這敢 tō 解釋?去街 á 路問一下,有 gōa 濟人袂曉。

是講你敢無發現,台語市場包括文字出版、音樂、電視媒體愈來愈濟使用母語?這敢 m̄ 是一个好趨勢。咱 kā 咱有志講,想法 ài tòe 著時代行出去。濟濟人陷佇「台語文學」,佇「文字」頂懸 gōng-gōng-se̍h 真拍損。你敢無發現濟濟華語作家一支跤踏入來母(台)語 ê 創作是為啥?咱大膽下一个較正面結論,這是怹人生上大 ê 突破,kap 早期濟濟台語前輩仝款。

「投資」二字無影較現實,時間就是一種資產。咱照鏡看家己,看人生你想欲留落來 siōng 價值 ê 物件是啥?

母語寫作就是社會運動。有人偏愛文字討論,咱早期 mā 是 ùi 使用漢字開始,漢羅到用全羅寫日記。這是需要時間練習–ê。任何 m̄ 捌羅馬字 ê 人,的確欲討論母語是 khah oh。這 m̄ 是咱 chia 欲講 ê 重點,我個人認為漢羅 lām 寫是一種資產配置 ê 概念,mā 是上符合目前 ê 讀者市場!當然,有人 tiāⁿ-tio̍h koh 有話,是講你敢知 chit 幾冬,我使用漢羅投華語詩刊有 gōa 濟?我用漢字參加文學獎、用全羅寫感言、台頂宣傳咱 ê 理念。有 gōa 濟華語作家已經 ta̍uh-ta̍uh-á 出台語冊,啊你到今有 gōa 濟建設性 ê 行動?對 siáng 有利益著?若無,你 ê「投資策略」是有問題。Koh 講一擺,咱 ài 換位思考,才通延續台語 ê 歲壽。

母語寫作就是個人運動。有人看著文學,soah 台語重頭輕,mā 有人講有台語無文學,咱不時 mā 看 tio̍h 台華頭人 lóng 冤家量債。咱 mā 無想欲參戰,mā 無 hiah 大 ê 權,改變 siáng。家己問家己就好,你一冬讀 gōa 濟文學冊、母語冊,是欲討論 siáⁿ?母語初學者敢免 ùi 生活講起、寫起,kā 強欲死去 ê 台語 khioh 轉來?Ia̍h-to 袂曉走,tō 想欲飛?這就是我個人感覺想欲寫、想欲學母語 ê 人看袂明 ê 所在──想傷濟!有話就講,有話就寫,這敢 m̄ 是上直接、上自然?論真,做袂到是 m̄ 知影方法,是無練習,無自律 ê 精差 niâ。所致,m̄-thang 大心肝,照起工 án-ne 才行會遠,kap 人生仝款。寫作人生,人生寫作!

我個人用台語寫日記,7、8冬 ah,lóng mā 是用 làng-phāng ê 時間寫 ê,khêng-si̍t mā 是為著欲練習台語。咱 m̄ 是專業作家靠這趁討,皮帶 hâ kah chhun 一支骨 mā 是 iau 死,這甚至是少數華語作家 chiah 做 ē 到 niâ。何況欲撥工寫 khah 有文學性 ê 作品。建議逐家去認捌蔡培火,伊用白話字寫日記,寫詞譜曲白話字之歌、編字典,《十項管見》是伊上有名 ê 著作。伊加入中國國民黨,佇體制內 sak 台語文,he koh 是另外一點值咱思考 ê 代誌。母語寫日記,一兼兩顧,對母語能力提升 kap 家己人生有一个負責 ê 態度真正不止仔好。

咱掠這个題目「做一个母語作家是人生上好 ê 投資」來探討,真 oh tī 一篇文章講完,咱向望引一寡 khah 無仝款 ê 思維 hō͘ 讀者來思考,尤其咱 tiāⁿ-tio̍h ài 學習「華語」界,che 我知濟濟先輩無啥認同,是講 in 敢 lóng 免讀翻譯 ê 作品?接 sòa 落來 nā 有機會 chiah koh 來講 kah 幼 leh,咱母語 ài 按怎做才好?當然,nā 有法度吸引有志做伙行,這就是我上大 ê 利益。Làu 一句網路話母,nā 有感覺心適,請 chhh 讚,kā 阮 o-ló、分享!

我有話要說