(請安裝Taigi Unicode字形，配合Firefox瀏覽器來讀)
作者：Ko Ka-hui
“Lán khì khiâ kha-ta̍h-chhia hó–bô?” A-hûn teh kā A-bûn kóng i siūⁿ beh khì chhit-thô.
“Hó ah! Tú-á hó góa bô tāi-chì, lán tō lâi khì ah!” A-bûn kóng .
A-bûn siūⁿ-tio̍h sè-hàn ê sî-chūn, i hām A-hûn chhiāⁿ chhiāⁿ chò-hóe sńg, in chū sè-hàn tō se̍k-sāi, sī khò͘-thâu kat sio liâm ê hó pêng-iú.
In-ūi in sī chhù-piⁿ, siang-hong ê pē-bú put-chí ah se̍k-sāi, tī siàu-liân teh phah-piàⁿ thó-thàn ê sî chūn, tō lóng ū teh chih-chiap–ah! Che khòaⁿ–khì-lâi sǹg sī “bōng-nî-chi-kau” lo̍h!
In ê pē-bú āu–lâi kóng, “Lán ê gín-á nā-sī tōa-hàn liáu, tō hō͘-in sêng-chhin chò ang-bó͘, in-ūi chit tùi chhiⁿ-mûi tek-má nā ē-tàng chò ang-á-bó͘ mā bōe-bái lah!” Ta̍k-ê koh ē-tàng chò-hóe siàu-liām tông-nî, hō͘-siōng chiàu-kò͘, si̍t-chāi sī chiok chán ê tāi-chì.
A-bûn ê kò-sèng chū sè-hàn tō chiok gâu hām lâng pôaⁿ-nóa, in-ūi lāu-pē sī sêng-lí-lâng, in A-pah ta̍k-kang kap lâng-kheh chih-chiap, kú–lâi i tō chai-iáⁿ beh án-nóa hām lâng kiâⁿ-ta̍h.
Sui-bóng i se̍k-sāi chiok chē súi ko͘-niû-á, m̄-koh i jīn-ûi siōng súi–ê iáu sī A-hûn. A-hûn ê bīn-bô͘-á chiâⁿ iù-siù, sin-hêng sán-sán ah, in bú–á lóng ē kā chhēng kûn koh kòa chhiú-liân-á, ta̍k-kang tō kā chng kah súi súi súi. Ū bōe-chió cha-po͘-gín-á siūⁿ beh hām i chò pêng-iú, m̄-koh i lóng chai-iáⁿ hiah ê lâng lóng sī khòaⁿ i seⁿ chò súi chiah siūⁿ beh chiap-kīn–i lah!
Chit-má tōa-hàn ah! I kap A-bûn ē-tàng chò-hòe ê sî-kan khah chió, i mā bô oàn-thàn, siūⁿ kóng seng chò hó Tâi-gí lāu-su ê kak-sek khah iàu-kín. Ah A-bûn leh? I tō tòe in A-pah chò seng-lí, sì-kè cháu-chông, thang hó thàn-chia̍h ê kang-hu!
In siang-hong ê pē-bú kóng hó in ê gín-á tōa-hàn liáu beh chò chhin chiâⁿ ê tāi-chì, bô hō͘ in ê gín-á chai. Put-jī-kò, in m̄-chai in 2 lâng pún-té tō lóng ū ì-sù ah! Án-ne kóng–khì-lâi,nā-sī beh kiat-hun m̄-tio̍h tùi-tâng tùi-tâng–ah? Kan-nā sī-tōa-lâng bô kā in kóng khí niā niā.
In sè-hàn siōng-ài chò ê tāi-chì tō-sī khiâ kha-ta̍h-chhia kiâⁿ-ta̍h, chit-má tōa-hàn nā-sī ū-êng, mā ē koh khiâ kha-ta̍h-chhia lâi pôe-phōaⁿ tùi-hong, in kám-kak khiâ kha-ta̍h-chhia sī kā sè-hàn ê hôe-e̍k chhōe–tǹg-lâi!
Ū chit kang, A-hûn beh khì ha̍k-hāu siōng-khò, soah tú-tio̍h chi̍t ê cha-po͘-lâng beh tùi i siáu-ti-ko, A-hûn chiok kiaⁿ-hiâⁿ–ê, i tō kóaⁿ-kín khà tiān-ōe kā A-bûn kóng, A-bûn mi̍h-kiāⁿ khǹg leh, sûi chông-khì kiù A-hûn ah!
A-bûn seⁿ-chò chin ko-chhiâng, i kàu hia ê sî, hit ê cha-po͘-lâng khòaⁿ-tio̍h i, tō A-pô-á làng-káng, sûi cháu-khì bih ah! I khòaⁿ chit ê chiok siūⁿ-khì–ê, tō kā A-hûn kóng: “Chit tiâu lō͘ m̄-thang kiâⁿ, siūⁿ kòe gûi-hiám ah! Í-āu lí beh khì siōng-khò, ài sè-jī, góa ē àm-tiong pó-hō͘–lí, m̄-bián kiaⁿ!”
A-hûn thiaⁿ i án-ne kóng, chiok kám-sim–ê, i sim-lāi teh siūⁿ, góa beh kè hō͘ i. Siūⁿ-tio̍h chia, i ê bīn lóng âng-kòng-kòng ah! I ê A-bú mā teh siūⁿ kóng hām A-bûn ê chhin-sū ài kóaⁿ-kín tēng lo̍h-lâi, ah bô i beh piàn chiâⁿ chi̍t ê lāu ko͘-niû lo̍h!
Kòe bô jōa-kú A-bûn tō khì A-hûn hia thê-chhin, siūⁿ beh kín kā chit ê ū tì-hūi koh chiok súi ê ko͘-niû chhōa ji̍p-mn̂g, m̄-thang koh tán–lo̍h-khì ah!
A-hûn ê pē-bú chiap-tio̍h A-bûn ê thê-chhin, tong-jiân mā ìn hó, in khòaⁿ ē chhut-lâi i sī chit ê ē-tàng hō͘ A-hûn hēng-hok ê lâng, jî-chhiáⁿ in siang-hong chá-tio̍h kóng hó–ah, kan-nā iáu-bōe khui-chhùi, soah hō͘ A-bûn chá chi̍t po͘ khí-kó͘ ah!
In khòaⁿ-tio̍h A-bûn tùi cha-bó͘-kiáⁿ hiah-nī chiàu-kò͘, sim-lāi chiok kám-tōng.
Kiat-hun liáu-āu, A-bûn mā-sī ē hām in bó͘ khiâ kha-ta̍h-chhia, tâng-chê hôe-sióng gín-á sî-tāi ê kì-tî. In sù-phòe ê hêng-iáⁿ hō͘ in hit-chng ê lâng chiok him-bō͘–ê. Tī in ê cha-bó͘-kiáⁿ chhut-sì chìn-chêng, in koh ē khì khòaⁿ pò͘-tē-hì, kám-chêng chin-chiàⁿ sī hó kah liân thiⁿ-chhiⁿ lóng kā in chiok-hok!
