【公報廣場】活絡台語文從生活環境開始

 Koeh Iàn-lîm

今年是《台灣教會公報》台文版重頭生30週年,真歡喜台文版30週年生日快樂,下底針對母語寫作、母語教學、鼓勵學生投稿以及對《教會公報》台文版提出一寡淺見,希望咱台語文愈來愈旺。

代先是《教會公報》台文版,筆者觀察,真濟台語老師會指導學生寫台文詩投稿,這是好現象。不而過,投稿 ê 學校大部分是中南部,北部、離島 kap 東部罕咧看著老師指導學生投稿,背後 ê 原因值得探討。咱台語媒體目前有公視台語台 kap 濟濟放送電台,毋過台文報紙 kan-na 《教會公報》有台文版 nā-tiāⁿ,《自由時報》文藝版有當時仔有台語文作品,不過是插花仔性質,更加凸顯《教會公報》台文版 ê 重要性。除了固定版面台文版以外,其實《教會公報》會使鼓勵記者抑是寫手佇其他版用台文書寫,擴大台文版面;台灣教會公報社 ê 囝仔報《甜蜜親子報》mā 會使用增加台語聖經故事 kap 尪仔圖,吸引囝仔兄看台文!

閣來是催生《台語週報》kap 台語實驗國小,台灣 ê 華語教育赫爾仔成功,《國語日報》kap 國語實驗國小 ê 推廣方式值得台文界參考!In 中華民國教育部政權非常認真 teh sak 華語,目前 koh 欲 sak 雙語教育,台語文教育會更加搶無資源。按呢講,毋是 leh 批評民進黨政權,是中華民國體制對台語文教育本身是被動性支持,台灣基督長老教會才是咱台灣母語 ê 民間教育部,中華民國體制對台語文教育 kan-na 注重聽 kap 講,讀 kap 寫毋是 in ê 目標!以早台語教科書廠商金安 bat 出版雙月一期《台語教育報》kap《海翁台語文教育季刊》,可惜攏敗市收擔,公報社會使評估催生《台語週報》可能性!論到催生台語實小,難度閣愈 kôan,根據台羅會有志提供消息,台南市政府2023年按算 beh 委託外界開台語幼稚園,chit-má teh 籌備,台語幼稚園成立,台灣父母會相挺無?

最後,牽轉來指導學生投稿 ê 問題,學生寫作 tiāⁿ tú-tio̍h 華語語法、語詞數量真濟,有法度輸出 ê 台語用詞真少,問題出在練習無夠,無法度由點(字)連線(詞)成面(句),寫出完整台語文章!建議公報社借用張裕宏教授編輯 ê《台語白話小辭典》舉辦查字典 kap 讀語詞比賽,詳細比賽辦法 ē-tàng 邀請專家討論,解決國小學生華語轉台語 ê 問題。

台語文教育 ê 問題目前猶原真濟,雖罔有《國家語言發展法》支持,但是台灣人對母語 ê 支持度 iáu 無夠,啥麼支持度 chiah 有夠咧?將台語列做升學、公職考試 ê 彼工就是 ah!看到遮,咱家己會支持無? (新竹中會山腳教會執事)

我有話要說