(請安裝Taigi Unicode字形，配合Firefox瀏覽器來讀)
作者：李南衡
阿德叔來厝裡坐，話煞講對中國去。阿德叔 hàiⁿ頭講：中國 chit 隻「無毛雞假大格（Bô-mo͘-ke ké tōa-keh）。」我問講，中國現此時是世界第二大經濟體，有200外種工業產品 ê 產量 kah 出口量攏是世界第一，其中有數十種產品 ê 出口占全世界出口總量 ê 70%以上。你講伊是「無毛雞假大格」是啥物意思？阿德叔應講，真正大隻 ê 雞，毛 súi koh 濟，看起來 tō 是有大隻雞 ê 款、有大隻雞 ê 格。有一種 成雞仔無幾枝毛愛展風神，激一个大隻雞 ê 架勢，煞 hông 看出伊是一隻假大格 ê 無毛雞。中國足愛展伊是製品外銷 ê 第一大國。
我講，2015年5月，中國國務院總理李克強提出，為 tio̍h beh 實現製造強國 ê 戰略目標，第一步是到2025年中國 tio̍h 會邁入製造強國 ê 行列，簡單講 tio̍h 是「中國製造2025」。阿德叔應講 che tio̍h 是我講 ê 假大格！全世界攏 hō͘ 伊嚇驚 tio̍h。第一個採取行動 ê 是美國 Trump 總統，2018年拚勢 kā 中國製造出口去美國約美金2000億 ê 中國產品增加10% ê 關稅，第二年正月初一，關稅起到25%。美國認為「中國製造2025」有牽涉 tio̍h 強迫佇中國設廠 ê 美國企業 ê 技術轉移、中國有偷 the̍h 美國 ê 智慧財產權，中國政府有補貼一寡企業。
美國認為對付「中國製造2025」上好 ê 方法之一，tio̍h 是幫助佇中國 ê 美國企業撤出中國，若徙轉去美國有減免稅 ê 優待，thui-sak 出美金250億 ê 補貼等激勵工廠撤出中國，tio̍h 是希望協助美國企業遷出中國紅色供應鏈。日本隨時 tòe-leh 做，撥美金22億協助日本企業撤出中國；南韓 mā 以財務援助、補貼 kah 減稅優惠鼓勵南韓 ê 企業撤出中國。
我問講，你講中國是無毛雞假大格，in ê 企業敢仝款是按呢？阿德叔緊應講，當然當然。上好 ê 例是中國通訊業 ê 第一大公司「華為」（Huawei），2018年華為手機仔全世界銷量臭彈突破2億支，2019年最後一季變作穩坐佇全球第一大手機製造商寶座。佇全球 kah 中國境內市占率達到30% kah 40%以上。美國 Trump 總統下令全世界 kah 美國有聯繫 ê 國家，攏禁止供應任何手機 ê 技術 kah 包括芯片在內 ê 各種零件 hō͘ 華為。華為一聲 tio̍h kau 起來 ah，市占率 chhun 無4%！你敢有聽講華為 beh 用人工智能技術，監測病毒來飼豬，續落去 mā beh 去挖塗炭。
阿德叔講，無毛雞 ê 真相是啥？今年3月，中國工業 kah 信息化部前部長苗圩直剖，中國製造業有大但是無強，逐項 to̍h 有但是無好，基礎能力薄弱，家己無關鍵 ê 核心技術，想 beh 達到製造強國 ê 目標，至少 tio̍h koh 等30冬。Koh 過幾冬，真有可能無人知影「無毛雞假大格」是啥意思。
