編按: 「2011台灣文學獎」2011年12月10日下晡，在國立台灣文學館館舉行頒獎典禮，本文作者王昭華以〈哀爸叫母〉作品得到創作類台語散文金典獎。作者是用台語寫文寫歌ê自由工作者，得獎作品請上伊ê部落格：blog.roodo.com/cit_lui_hoe/archives/18031001.html。 
◎王昭華
去提款機洗寄金簿，機器共（k?）簿仔吞落，含（kâm）t?嘴內吱吱吱吱寬寬仔哺，哺kah有聲有款有齊著（chiâu-tio?h），到氣矣，才一下吐出來還我。
一港？一桶？一khat？一觳（khok）？&hellip&hellip公報社ê編輯來批恭喜我得獎，而且，希望我會當共創作ê心情佮（kap）讀者分享──我想我是共「『創作』ê心情」佮「『得獎』ê心情」捎（sa）顛倒反去矣，一直牢（tiâu） t?彼兩觳錢水ê歡喜佮感慨裡。
對1990年接觸著台文，那料想會到，20年後，主要是靠台語咧食飯（食會飽袂飽是另外一回事）。人生，想袂到ê代誌真濟，毋過，若講著「生涯規劃」ê時，總是攏按想會到ê光景去設想。想會到ê光景：出社會、食固定ê頭路、趁錢儉錢、結婚、建立家庭、生囝晟囝、囝離跤手、老&hellip&hellip；少年時代ê我，並無按呢ê眼光，目睭無才調看出一幅未來ê藍圖，但是注目t?家己ê肚臍，算講了解家己有啥物款能力，就「忠於自己」，按上帝賜h??我ê才情，爛田準路行落去──如此而已。
這中間，並無啥物「有夢上」ê「夢」，嘛毋是啥物追求成就ê奮鬥路途，只不過是「盡己」。我對台語ê語感袂bái，我就盡量去發揮；我ê語感受華語影響嚴重，就較謙虛兮去學習按怎分拆，鋩鋩角角（mê-mê-kak-kak）慢慢仔掠，總是會進步，著無？！
我嘛佮你仝款，看無頭前ê路，但是跤前有一葩燈，沓沓仔摸，感謝主，應該死袂去。我嘛佮你仝款，知影寫這台文足歹看，人看無；但是，欲等kah人齊看有才寫，是永遠等無彼工。寫，發聲，是宣告「恁祖媽t?遮！」，背骨ê囝孫毋通siu?假痟。（是講，若正經痟，就無藥醫了！）
確立這?基本態度，堅心t?一坵園潦落去了後，賰ê，就是技術磨練ê問題矣。各行各業行到透，應該攏仝這條理路。不而過，面對一坵爛田，這身欲「潦」會落去「潦」袂落去？逐?心內攏一直咧算&hellip&hellip千算萬算，毋值天一劃。
對家己上根本ê文化，嘛是用「算」ê心態咧秤斤兩捏輕重，這應當才是生理人底ê閩南人ê本性，就算轉骨變成咱家己認定ê「台灣人」，文化基因假若嘛猶牢t?骨髓裡。
生理人底罔生理人底，卻是生理囝歹生。我嘛毋是生理囝，算盤頇顢（han-b?n）擉（tia?k），才會錢水滴滴流，無一港ê，嘛無一桶ê。
T?這款情況之下，我求個人ê生存都袂赴飼矣，致使實在無法度回答你有時擲過來ê大問題，譬如母語ê前途等等有ê無ê；我確定我無義務符合任何人ê期待，欲寫、欲毋寫，只要對家己負責，不過到目前為止，猶算是一?失責ê人。
一人一路，我t?我ê爛田路，向你ia?t手哦。
 
