耶穌 ê 家譜

繪圖╱CHC

◎柯三益

起頭,地是空空混沌、黑暗無光,上帝造穹蒼、創造天地。耶和華上帝用地上 ê 土粉,照著伊 ê 形像 chhiau 做人,將氣 pûn 入人 ê 鼻孔,chit-ê 人就成做有靈魂 ê 活人,名叫做亞當。耶和華上帝講 chit-ê 人單身 m̄ 好,就提亞當 ê 一支脇骨,包密伊 ê 肉,chō-chiâⁿ 一 ê 查某人來 phit-phòe 伊,chit-ê 查某人叫做夏娃。
亞當、夏娃違背了上帝 ê 旨意,挽智慧樹頂面 ê 善惡果食伊,互上帝趕出伊甸樂園。對按呢,亞當著勞苦工作,夏娃著懷孕生子,經歷人生 ê 苦楚 kap 艱難,也著面對死亡 ê 事實。亞當、夏娃出了樂園,tī 亞當130歲 ê 時生一 ê 子叫做設。
設生以羅士;以羅士生該南;該南生瑪勒列;瑪勒列生雅列;雅列生以諾;以諾生瑪土撒拉;瑪土撒拉生拉麥;拉麥生挪亞。挪亞生活 ê 年代,耶和華上帝看見人 tī 地上罪惡真大,耶和華上帝心內憂傷,後悔造人 tī 世間,只有挪亞 tī 耶和華面前得到恩典,伊命令挪亞造大船,當大水來 ê 時,只有 tī 船頂 ê 得到活命。大水消退、乾地出現,挪亞全家出大船,起祭壇 kap 上帝立虹 ê 約。
挪亞 ê 大子叫做閃;閃生亞法撒;亞法撒生沙拉;沙拉生希伯;希伯生法勒;法勒生拉吳;拉吳生西鹿;西鹿生拿福;拿福生他拉;他拉生亞伯蘭。耶和華上帝立亞伯蘭做濟濟國 ê 父,將亞伯蘭改名叫做亞伯拉罕。亞伯拉罕信心堅定,凡事聽趁上帝命令,甚至願意將家己 ê 子以撒做祭物獻互上帝。耶和華上帝應允亞伯拉罕 ê 後裔子孫親像天頂 ê 星、海邊 ê 沙 hia 多,並且地上萬國欲因為亞伯拉罕 ê 後裔得到福氣。
亞伯拉罕生以撒;以撒生雅各;雅各生猶大;猶大生法勒斯;法勒斯生希斯倫;西斯倫生亞蘭;亞蘭生亞米拿達;亞米拿達生拿順;拿順生撒門;撒門生波阿斯;波阿斯對路得生俄備得;俄備得生耶西;耶西生大衛。
顧羊 ê 大衛往軍營看伊 ê 兄哥,聽見非利士人歌利亞對以色列 ê 軍隊 hán-hoah,以色列人驚惶逃走,大衛向以色列王掃羅自請出戰。穿戰甲行 bōe 去,thǹg 落戰甲,手提 hìⁿ 石 ê 索仔,靠耶和華上帝 ê 名,用索及石頭刣死歌利亞。耶和華上帝及大衛同在,抹油大衛成做以色列 ê 王。大衛威風凜凜,軍隊強大,攻取錫安、戰敗非利士人、摩押人,也歸服亞蘭人。大衛 ê 爭戰,耶和華上帝攏互伊得勝,互伊有權柄向以色列百姓施行公義。
大衛生所羅門;所羅門生羅波安;羅波安生亞比亞;亞比亞生亞撒;亞撒生約沙法;約沙法生約蘭;約蘭生烏西亞;烏西亞生約坦;約坦生亞哈斯;亞哈斯生希西家;希西家生瑪拿西;瑪拿西生亞們;亞們生約西亞。
百姓被遷徙到巴比倫 ê 時,約西亞生耶哥尼亞;百姓遷徙到巴比倫了後,耶哥尼雅生撒拉鐵;撒拉鐵生所羅巴伯;所羅巴伯生亞比勿;亞比勿生以利亞金;以利亞金生亞所;亞所生撒督;撒督生亞金;亞金生以律;以律生以利亞撒;以利亞撒生馬但;馬但生雅各;雅各生約瑟,就是馬利亞的丈夫,主耶穌基督就是馬利亞對聖神懷孕所生 ê 子。
主耶穌 ê 出世,應驗了耶和華上帝對亞伯拉罕 ê 應允,對按呢,萬國攏因為亞伯拉罕 ê 後裔得到福氣。起頭,地是空空混沌、黑暗無光,上帝造穹蒼、創造天地,罪是對亞當開始,死也是對罪開始。只有咱 iáu 做罪人 ê 時,主耶穌為咱來死,並且對死人中復活。信實 ê 上帝疼咱到極,亞伯拉罕 ê 後裔,大衛 ê 子孫,至好朋友就是我主耶穌基督,信耶穌互咱對罪 ê 內面得到釋放,互咱佇恩典中歡喜向望上帝 ê 榮耀。

我有話要說