◎許筑媗
時間過了真緊，一目nih仔，我已經是一个六年仔ê學生矣。想起六年來ê生活，酸、甜、苦、澀，攏tī其中，予人真懷念。有時陣一个人坐佇遐失神去，就會不知不覺轉去過去ê時間內耍，見擺想著細漢ê時陣做ê戇代誌，攏會擋袂牢笑出來，實在真趣味。
但是時間是袂等人ê，烏枋頂懸倒頭算ê日子愈來愈少，m̄甘ê離情嘛一日比一日閣khah濟。
感謝父母，予我有幸會當進入美術班；感謝老師，予我佇遮ê日子內成績真好；感謝同學，予我六年ê快樂光景，成為我人生中一段美好ê記持。無定畢業了後阮就會真少見面矣，但是就算是閣較遠ê距離，嘛搝袂斷阮逐家之間真誠閣堅強ê友誼。
面對未來，有期待、有驚惶，求學之路一定無好行，m̄過我會用勇氣佮信心，將一條刺仔湠開ê艱苦路，沓沓仔轉變做一片布滿玫瑰花瓣ê平坦之路，為我ê夢想努力。
