 ◎林俊育
訪問
孫雅各牧師ê   
cha-bó?-kiá?
 
2010年北美教協神學研究會，10月12～16日t?芝加哥舉行，我也應邀去分享「台語信望愛資源kap網路福音事工」。
主辦單位芝城台灣社區教會為tio?h感謝講師ê辛勞，特別舉辦謝師宴，唐瑪理安宣教師（Marilyn Tank）也受邀請參加chit-ê晚宴。現任北美教協宣教師關懷委員會主席林皙陽牧師就kap我趕緊把握機會做一個短短ê訪談。
瑪理安kap台灣
瑪理安是前台灣神學院院長孫雅各牧師（Rev. James I.Dickson, 1900～1967）kap芥菜種會（台語是讀做「芥菜籽（chí）會」）創辦人孫理蓮牧師娘（Lillian Dickson, 1901～1983）ê cha-bó?-kiá?，她ê父母對台灣ê貢獻人人lóng知，到ta?台灣人iáu-teh siàu念無soah。
孫理蓮牧師娘是家庭主婦，也是宣教師，她ê第一胎是kan-ta活2禮拜ê早產cha-bó?囡仔。後來koh生1個cha-po?-kiá?羅尼，但大學畢業了後就患小兒痲痺症，必須靠輪椅行路，有完成碩士學位。後來，koh生1個cha-bó?-kiá?瑪理安（Marilyn Dickson）。
瑪理安kap宣教師唐華南牧師（ Rev.  Vernon Tank）結婚。孫理蓮牧師娘設立芥菜種會後，由唐牧師協助開拓各式ê醫療、兒童、婦女事工，並協助東部地區開拓教會，瑪理安當然也深入參與chiah-ê事工。
瑪理安1990年退休後，t?g去美國toà t?芝加哥，hit期間因為心連台灣，陸續t?g來台灣協助ta?k項事工，直到1997年chiah完全定居芝加哥。定居芝加哥了後，雖然已經70 go?歲，iáu主動去芝加哥台福教會幫助。所以，美國社區ê台灣人特別邀請她來參加chit-ê晚宴，她真歡喜來參加，因為她ê心永遠b?-tàng kap台灣割離。
我kap林皙陽牧師來到餐廳，瑪理安ê坐桌已經滿滿，無法度坐kap她仝桌，只好kap她約餐後訪問。Ùi遠遠看她kap仝桌ê人有講有笑，心內?g望餐會緊soah，thang好來開始訪問，享受她ê歡喜笑聲。
瑪理安ê名片
晚餐了後，阮就t?餐廳ê接待室開始訪問。她ùi皮夾á the?h出一張淺粉紅色ê名片，我歡喜接過來，她隨講：「B?-tàng h??你lah，我kan-ta chhun chit張。」我要求借我錄影hip相，她笑微微講：「無問題，chhut-ch?i你去hip，橫直hip b? phái?。」
He是真傳統ê漢字名片，正pêng是「基督教芥菜種會」，中央是「唐瑪理安（宣教師）」，倒pêng是「辦公室：台北市中山區10465雙城街49巷6-1號3樓／電話：五九七五○二六；五九七四八六八」。
她講，chit張名片是她siàu念台灣ê憑據，她ê青春lóng奉獻t? hia。
瑪理安ê台語
阮起初想講tio?h需要請耶魯大學神學院畢業ê林珊宇牧師（林皙陽牧師ê cha-bó?-kiá?）來做翻譯，但是瑪理安真客氣，一開始講她ê台語無好了後，她就lóng用標準ê台語kap阮對話。現今她已經70 go?歲à，離開台灣也有20冬à，可見她t?台灣ê時lóng使用台語，因為她真正有疼心來服務台灣人。若是外來政權統治者來到台灣，就用盡辦法來消滅台灣母語，實在是兩種完全對反ê心腸。
晚餐了後ê感恩音樂會，陳美蕙牧師上台紹介瑪理安宣教師ê父母對台灣ê貢獻，瑪理安t?邊á聽kah笑微微，因為陳牧師是用她所懷念ê台語講，koh是teh講她ê父母ê t?i-chì，心內一定爽快kah b?講得。
紹介了後，瑪理安用台語背1節聖經，哥林多前書15章58節：「所以，我所疼ê兄弟ah，lín tio?h堅固，無搖choah，常常盡力t?主ê工；因為知lín tio?h磨t?主ê m?是空空。 」（巴克禮版台語聖經）Chit節聖經說明她kap她ê翁婿kap她ê父母t?台灣所做上帝ê工是上帝所歡喜接納ê。 
Chit時h??我想起哥林多前書1章27節：「&hellip&hellip上帝用世間人看做弱ê t?i-chì來h??強ê人見笑。」（現代台語新約聖經），chit句聖經若k?伊改寫做「&hellip&hellip上帝用外國人講台語ê t?i-chì來h?? m?使用家己母語ê台灣人見笑。」kap事實真ha?h。
瑪理安在台灣
林牧師踏話頭來kap瑪理安拉關係講：「我t? 1981年去台灣神學院圖書館服務ê時，toà ê宿舍是t? lín媽媽ê樓腳，阮cha-bó?-kiá?珊宇（當時坐t?瑪理安邊á）是t? hia長大ê。」瑪理安聽kah笑bún-bún。
瑪理安就kah-ná機關槍一直講落去：「阮基督教芥菜籽會t?新莊辦孤兒院、盲人重建院，koh去花蓮辦學校，栽培學生去讀玉山神學院了後做牧師。也有培養幼稚園老師h?? in t?g去山頂ê教會幼稚園服務；m?有辦殘障孤兒院、育嬰所、未婚媽媽之家、肺病療養所（有百go?個得到醫好t?g去）。
她續接koh講：「我ê頭家（丈夫）真ài開拓教會，像講光濱教會、北埔教會等，lóng是t?伊ê協助下成立ê。伊ùi家庭禮拜來開始，人數漸漸增加了後chiah成立教會，總共開拓6間á是7間教會。」
她koh講：「阮1990年退休t?g來美國，也不時t?g去台灣關心阮所開設ê教會。阮lóng是準備美金5000 kho?，一直到hiah-ê錢用完chiah koh t?g來美國。到1997年為止，阮lóng是án-ne做。」
現今ê瑪理安
她koh講：「我chit-má t? Billy Graham（葛理翰）圖書館做義工，若有台灣來ê參觀團，同事就講：瑪理安t? chia，lín需要會曉講台灣話ê人。」退休t?g來美國iáu-koh teh為台灣人服務，瑪理安?-sái講是一生奉獻h??台灣人，是上帝差遣她來做台灣人ê天使，咱是上帝賜福滿滿ê台灣人。
