〈我 ê 老爸〉──老爸80歲祝壽感

13

Chng Hūi-phêng

阮爸–a,出世 tī 雲林縣古坑崙仔,隔壁庄有麻園,附近 ê 庄社,會當用阮細漢一首唸謠「湳仔攬查某,崙仔輪車鼓,古坑摃鼓,水碓娶某」來形容。阮公–a,阮爸–a,lóng 是大囝。出世彼陣是日本時代,-koh 讀冊 ê 時已經是中國國民黨統治,tī 庄裡 in 彼沿–ê,攏是用日本名 teh 稱呼,he 是 in 熟似 ê 名字,阮家族 LINE ê 團名 mā 是借伊 ê 日本名武彥(HIKHO)。

阮老爸是做穡人,伊身材雖然瘦 thio,-koh khang-khòe 會做,跤手 liú-lia̍h,10 幾歲就做大人 khang-khòe,tī in 彼沿–ê,大家 o-ló,看伊少年 tī 金門做兵 ê 相片,mā 是緣投 sàng。
食飯 ê 時,-bat 聽伊怨嘆無菜抑是飯 siuⁿ 灄(lia̍p),配菜有夠省;伊愛食海產,尤其是鮮 ê 蟳仔,魚仔,炊–ê,煮湯–ê 上 ha̍h 伊 ê 味,看伊 teh 吮(chhńg),he 毋知有偌好食咧。

我對伊上早 ê 印象是細漢 ê 時,tī 公廳 phâng 面桶水, 坐 tī 戶碇 kā 我洗身軀,讀國小 ê 時,阮庄裡當 teh 時行種松茸,阮 tau mā 起 2、3 棟松茸寮(早前是用竹管做架仔,塑膠布做壁,外殼 khàm 甘蔗 ha̍h ,內底有 2 lêng,一 lêng 有 3、4 層 ê 松茸 pêⁿ,pêⁿ 內底有稻草肥、菌絲、頂面蓋塗)。
種松茸 ê 工課有夠濟,像講燒淨氣 2 暝 2 日;漚稻草肥,稻草肥是 kā 稻草剪 hō͘ 短、沃水、掖肥料(尿素 kah 過石仔……),péng 6、7 遍,才用篾仔籃 té 去舖松茸棚;篩田土 ê 工課,我 mā 做有著,坐 tī 篩仔 ê 邊仔 kā 田土篩 hō͘ 細粒 koh 掖石灰殺菌,才用糞箕 té 去蓋松茸棚。
松茸大欉,半暝著起床,切松茸,賣松茸腳(會當賣錢做四秀仔),早起就有生理人載碗粿 kah 包仔饅頭來賣,人 he 碗粿 khiū-teh-teh (𩚨),頂面有摻菜脯,若 chham 蒜頭豆油,食起來有夠好滋味;包仔 chham 饅頭,若 chham hiam 豆油,mā 是有夠讚,hit 陣厝內桌頂 ê 菜,四常攏是松茸料理,毋是松茸牽羹,無著是松茸炒荷蘭豆,薑絲麻油炒松茸。

閣來就是小工當 chē ê 時,in 4、5 點去無閒田 ê 工課,轉來食 chái 起,食 soah,koh 趕去做小工;做小工 nā 較早轉來,著 koh 去田裡,無閒 kah 暗眠摸,chiah 甘轉來厝。

伊 kah 阮母–a 無暝無日為這 ê 家 teh phah 拚累積,chiah tī 我高中 ê 時,kā 阮兜 ê 塗壁厝翻起樓仔厝,koh 有 hak 幾若 tè 田,阮兜 mā bat 飼過豬,-koh 賣一隻豬 ê 錢,拄好 hō͘ 我去朴子看一擺腳 ê 錢。我考著嘉中,伊有買一粒手錶 hō͘ 我,用 o͘-tó͘-bái 載我去嘉義 ê 宿舍。

較早,阿爸除了薰嗽以外,瘦罔瘦,-koh 猶若牛 hiah-nih 勇,10 幾年前彼 pái ê 手術,chiah 發覺伊 ê 身體已經拍折,改薰 khiūⁿ 喙無閣食檳榔、維士比,保牢性命,這幾年受著 COPD 肺部 ê 折磨,hō͘ 伊閣較瘦,看佇序細 ê 阮,實在真  甘,-koh 最近看伊身體漸漸勇健,真替伊歡喜。
感謝伊 kah 阮母–a,晟養阮大漢,hō͘ 阮學著勤儉拍拚,跤踏實地,免驚 bōe 出頭天

 

我有話要說