〈攏會老〉

(請安裝Taigi Unicode字形，配合Firefox瀏覽器可閱讀)

作者：Iâu Chì-liông

你會老我會老
時間攏會到
食老免煩惱
袂合莫深交
歹話莫出口
好命的有囝有孝
身體䆀的提早交
有閒泡茶來破豆
互相疼惜做伙老
講天說地食到老老老

你會到我會到
大家攏會到
認真上界𠢕
年歲免誇口
油鹹少入口
好命勇健食到老
會食會睏世界「好」
朋友疼惜做伙到
插伊天地車畚斗
逐日歡喜隨時準備到

歡喜到快樂到
世事勿計較
健康上必要
性命有盡頭
歡喜食到老
做好模樣著有孝
該儉該用勿過頭
該捐該獻著出頭
和諧和睦人人「好」
逐日歡喜等時日盡頭

Lí ē lāu góa ē lāu
Sî-kan lóng ē kàu
Chia̍h lāu bián hoân-náu
Bē-ha̍h mài chhim-kau
Pháiⁿ ōe mài chhut kháu
Hó-miā–ê ū kiáⁿ iú-hàu
Sin-thé bái–ê thê-chá kau
Ū êng phàu tê lâi phò-tāu
Hō͘-siong thiàⁿ-sioh chò-hóe lāu
Kóng thiⁿ soeh tē chia̍h kàu lāu-lāu-lāu

Lí ē kàu góa ē kàu
Tāi-ke lóng ē kàu
Jīn-chin siāng-kài gâu
Nî-hòe bián khoa-kháu
Iû kiâm chió jp kháu
Hó-miā ióng-kiāⁿ chia̍h kàu lāu
Ē chia̍h ē khùn sè-kài“hâu”
Pêng-iú thiàⁿ-sioh chò-hóe kàu
Chhap i thiⁿ-tē chhia-pùn-táu
Ta̍k-jt hoaⁿ-hí sûi-sî chún-pī kàu

Hoaⁿ-hí kàu khoài-lo̍k kàu
Sè-sū mài kè-kàu
Kiān-khong siāng pit-iàu
Sìⁿ-miā ū chīn thâu
Hoaⁿ-hí chia̍h kàu lāu
Chò hó bô͘-iūⁿ tio̍h iú-hàu
Kai khiām kai ēng mài kòe thâu
Kai koan kai hiàn tio̍h chhut thâu
Hô-hâi hô-bo̍k lâng-lâng“hâu”
Ta̍k-jt hoaⁿ-hí tán sî-jt chīn-thâu