(Chhiáⁿ an-chong Taigi Unicode jī-hêng, phòe-ha̍p Firefox Browser lâi tha̍k. 請安裝Taigi Unicode字形，配合Firefox瀏覽器來讀)
【台文版復刊30週年紀事】
1885年巴克禮牧師用 PE̍H-ŌE-JĪ（白話字）發行台灣頭一份報紙《Tâi-oân Hú-siâⁿ Kàu-hōe-pò》（今《台灣教會公報》，簡稱《教會公報》）。1969年3月中國國民黨政府禁止白話字，1049 kap 1050期合併出刊，成做最後一期 ê 白話字報紙。Kāng 年12月，《教會公報》復刊，改用中華民國語發行，停止使用84冬 ê 白話字。經過22冬後 ， 1991年9月22日《教會公報》第2064期正式開設兩版〈台語特刊〉，用台語漢字 kap 白話字刊登文章。2002年，台文版由兩版縮作一版。算起來，台文版復刊到今，拄好滿30冬矣。本期 kap下期特別企畫專題，邀請歷年來佇台文版筆耕 ê 作家，分享 in ê 心情，mā 祝福台文版復刊30週年。未來 ê 路猶真長，向望讀者多多支持台文版，用母語寫作投稿《教會公報》，利益母語使用，落實台灣基督長老教會「認同所有的住民」ê 信仰告白。 （《台灣教會公報》台文版主編林碧堂）
文 ◎ Gô͘ Jîn-sek
圖 ◎Tân Hūi-ngá
2020東京奧運 ê 柔道銀牌選手楊勇緯 tī 輸 hō͘ 對手高藤直壽了後，用日語 kā 伊講：「おめでとう（恭喜）！」此項事隨時 tī 日本 ê 社群平台引起一陣「現象級」ê 超人氣，有網友反應講「chin感動」。講真 ê，奧運內底 ê「帥哥」實在 bē chió neh。
Kan-taⁿ 一句母語 tō ē-tàng 引起 hiah-ni̍h 大 ê 親近感！若 án-ne上帝所賞賜 hō͘ 咱 ê「母土語言」，對咱 ê性命 kap 信仰 kám 有仝款 ê 影響力，á-sī 有啥 mi̍h 款 ê 感動 kap 意義？反 tńg 來講，一個放棄母土語言 ê 社會，是 m̄ 是會親像 hâm 老母無親 ê 囝仔 ê 人格發展，á-sī chhiūⁿ 無根 ê 浮萍四界 tòe 漂流一樣？
1999年秋準備 beh 二度退休離開台南神學院 ê 鄭兒玉牧師，邀請我將伊過去所寫 ê 詩歌 kā 編輯出版做紀念，就是後來 ê 基督信仰 kap 台灣民主運動詩歌集《台灣翠青》。Tùi án-ne 我踏入母語運動 ê 行列。2001年台灣羅馬字協會（台羅會，TLH）成立，鄭牧師推薦我擔任監事，後來 koh 做過秘書長 kap 理事。Hit 時電腦資訊 iáu 無真方便 phah 白話字，各山頭堅持家己 ê 方式，所知 ê 羅馬字有 chiâⁿ 百套。Mā 有教授 the̍h 教會白話字 sió 改改 leh，to̍h 當做家己 ê 發明，講：「Lín 教會羅馬字早已經死 ah，行入教堂看無羅馬字，無人 teh 用，少年 ê 無人 ē-hiáu。」咱 mā 無話 thang ìn 伊。
是啊，我 to̍h 是白色恐怖戒嚴時代大漢 ê，學校禁母語、《教會公報》hông 禁止用母語印刷，全台各地 ê 母語聖經、聖詩、雜誌報紙、字典等等陸續被沒收，甚至各教會 lóng 收著講道 tio̍h 改用「國語」ê 通知。佳哉，為著母語會眾，台灣長老教會有堅持至今，當然 mā 成作KMT ê 目睭內 ê 刺，長期派人來亂。
Tī 文字媒體被封鎖 ê 80年代，《教會公報》bat 為 tio̍h 台灣人勇敢出聲，解嚴前，公報 ê 刊頭攏有「時代的米該雅」chit 幾字，象徵舊約聖經先知米該雅，tī 極權政治下受特務人員 ê 恐嚇，卻根據信仰良心，以上帝 ê 公義警醒社會，宣揚拯救 ê 福音。
「若《教會公報》在台灣能以上帝的公義警醒社會，宣揚耶穌拯救的福音，使一千八百萬台灣人民出頭天的話。《教會公報》同工們願意付出任何代價。……看啊！對《教會公報》的迫害將會漸漸消滅，而到最後所存留的將是上帝的公義與耶穌基督拯救的真理。」（鄭兒玉）
《教會公報》當初創刊是為 tio̍h 幫贊多數 m̄-bat 漢字 ê 信徒學習羅馬字，thang 家己閱讀聖經，mā 為 tio̍h 傳達教會消息方便，聯結信徒，koh 兼有教育信徒 ê 使命。報紙內容包山包海，有各地教會消息、所屬教育 kap 醫療事業動態、國內外社會時事、聖經遊戲、聖經釋義，以及生活新知等等，是 chin 有獨特性 ê 台灣百年歷史百科全書。
過去 ê「時代的米該雅」tī 失去母語，迷失 tī 華語思考 ê 現在，iû-goân 保持 tio̍h 台文米該雅 ê 精神。《教會公報》設立 chit-ê 台文版，除了繼續負起歷史傳承 ê 責任，幫助 m̄-bat 台語 ê 人，ē-tàng 透過文字再度學習 chit-ê 上帝賞賜咱 ê 美麗語言。Mā 期待台文版 ē-tàng 進一步成做台灣各族群間 ê 橋梁 kap 幫贊，將母語擴大作「母土語言」（lóng 是「台文」ah），彼此學習各族群 ê 基礎生活用詞。當兄弟姊妹教會 sio-tú ê 時，ē-tàng 用對方熟識 ê 話語 tī 主內彼此請安，互相鼓勵。Chín 無人 kā 咱壓迫 ah，kiám thang koh 家己放棄？
延伸閱讀：
【特別企畫】白話字──珍貴 ê 文化資產-1
【特別企畫】我 ê 台文生活記持-3
【特別企畫】上帝引 Chhōa ê 台文路-4
【特別企畫】教會公報台文重頭生30冬-5
【特別企畫】我 ê 寫作過程-6
【特別企畫】牽手做伙行-7
