【特別企畫】我 ê 寫作過程-6

(攝影/湯立琳)

(Chhiáⁿ an-chong Taigi Unicode jī-hêng, phòe-ha̍p Firefox Browser lâi tha̍k. 請安裝Taigi Unicode字形,配合Firefox瀏覽器來讀)

【台文版復刊30週年紀事】

1885年巴克禮牧師用 PE̍H-ŌE-JĪ(白話字)發行台灣頭一份報紙《Tâi-oân Hú-siâⁿ Kàu-hōe-pò》(今《台灣教會公報》,簡稱《教會公報》)。1969年3月中國國民黨政府禁止白話字,1049 kap 1050期合併出刊,成做最後一期 ê 白話字報紙。Kāng 年12月,《教會公報》復刊,改用中華民國語發行,停止使用84冬 ê 白話字。經過22冬後 , 1991年9月22日《教會公報》第2064期正式開設兩版〈台語特刊〉,用台語漢字 kap 白話字刊登文章。2002年,台文版由兩版縮作一版。算起來,台文版復刊到今,拄好滿30冬矣。本期 kap下期特別企畫專題,邀請歷年來佇台文版筆耕 ê 作家,分享 in ê 心情,mā 祝福台文版復刊30週年。未來 ê 路猶真長,向望讀者多多支持台文版,用母語寫作投稿《教會公報》,利益母語使用,落實台灣基督長老教會「認同所有的住民」ê 信仰告白。 (《台灣教會公報》台文版主編林碧堂)


 

◎ 杜信龍

咱開始使用台語寫作 ê 時間,量期約欲八冬啊。講實在 ê,真 giâu-gî 家己 ē-tàng kā 一件代誌做 hiah 久。八冬窮實算短, tī咱知影 ê 寫手、作家真濟 lóng 有25冬較加。咱 mā 有觀察台文出版是愈來愈旺,質 mā 愈來愈好,寫 ê 人愈來愈濟。Tī chia,咱就直接來分享一寡咱感覺寫作 ê 要素 kap 建議,向望互有興趣、學習拄著困難 ê 人一个方向 kap 交流。

咱一開始根本就毋捌想過欲做作家,是干焦想欲為家己 ê 母語留寡文字紀錄,mā 為家己 ê 父母話 kā 尊嚴揣轉來。這 lóng 是真熱情 ê 想法。總–是,熱情 ê 火 nā 無好好仔寶惜,是有可能化–去。

母語欲行久長,就愛有系統性、計畫性策略。這講起來袂輸真偉大、真嚴肅,有人可能mā 會認為過頭激進,感覺做袂到。有人 mā 可能認為「我就平常時有 leh 講台語就好」。Tī chia 我認為台語 ê 危機 iû-goân koh 真懸,現此時,台語 ê 時勢確實真好,無趁 chit 時好好 á 寫作,是欲等何時?

系統性、計畫性策略窮實佇正常 ê 語言寫作是真 sù-siông 的代誌。咱看早期 ê 台語作家真少有 chit 款 e 觀念。真濟 in-toaⁿ,對寫作 chit 項「事業」無整體 ê 規劃意識,這造成寫作 ê 時間可能 kan-taⁿ 短短幾年 niā-niā,對咱來看是真拍損。

目前的文類創作,猶原 a̍h-sī 詩占 kah 大,散文有較濟 tām-po̍h,總是嘛是少數,小說是少 kah 無看。主流出版社出 ê 冊有較濟,以 gín-á 繪本為主,che 向望會當 ín-chhōa 社會閱讀 ê 氣氛。相對主流出版社,靠地方文化局、國藝會補助 ê tian-tó khah 濟。這 mā thang 反映寫作 ê 人出版 ê 困境。

面對 chia–ê 困境,我列出目前所有有收台語稿 ê 刊物加上文學獎,量其約欲15个,無論有稿費、無稿費,有限制專題抑無,漢字羅馬字比例……等等,我 lóng 盡量投稿,成做我練習 ê 平台。M̄ 驚 hŏng 退稿,評審無友善 ê 態度,kan-taⁿ 看正面 ê 評語。先莫論質,一冬粒積起來 mā 有出一本冊 ê 量。這功夫無算 siáⁿ。總–是,欲連做7、8冬無 hiah 簡單,一個月就愛寫四篇稿以上。這種做法,我捌觀察幾个華語作家 lóng 是 án-ne 做,無道理咱母語人做袂著。有一寡刊物、文學獎,窮實是限制用華語參加,這幾冬m̄有漸漸接收台語稿,甚至有台語小說、台語詩著獎。這 lóng 是真友善 ê 發展,台語人無應該限制家己,應該主動去突破,無試m̄知影。

當然有 khah 死執用字 ê 朋友,講無符合伊 ê 主張。個人看法,這有影是氣魄!總–是,無著獎,無發言權。這就是現實。世界無可能tòe咱 leh 轉 se̍h,如果直直拒絕改變 ê 機會,抑是用喙講卻無行動,是無可能有結果–ê。何況,改變是需要時間。

頭幾年咱比文學獎,lóng 是寫漢羅,明明寫了袂 bái,落尾,mā lóng 無入選。看評審咱才知,he koh 是用字 ê 意識形態。後來,咱改變用字策略,才開始著獎。咱所有 ê 感言恢復咱用字 ê 慣勢,有發言 ê 機會絕對 khiā tī 台仔頂講咱 ê 訴求,所有 ê 獎金 lóng 去買相關台語相關文史資料 kap 冊,koh 再透過「投資」(閱讀),改善寫作,投稿、參賽,這變做我個人對台語重新學習 ê 流程。這對我來講是一種變通,tī 無資源 ê 環境 kā 家己有法度做 ê 做到上好。

欲有固定 ê 寫作,對咱 m̄ 是語言科系 ê 人來講挑戰愈大。總–是,語言 ê 應用是多方面的,m̄ 是 kan-taⁿ 用 tī 文學身上。何況,華語文學出版 mā 占小小一部分 niâ。有興趣欲使用母語寫作 ê 有志有影 m̄-thang 束縛家己。寫你想欲寫 ê 題材,有計畫去收集相關資訊,整理做一本冊,這是一般受過研究所訓練 ê 人,lóng 應該有才調做會到 ê。Án-ne 母語路 mā 才會愈來愈闊。

Tī chit ê 人人 lóng 是作家(面冊作家)ê 時代,咱感覺加一个華語作家,無 siáⁿ 稀罕, nā ke 一个台語作家 , he tō 有真大 ê 意義。Tī chia,咱用真實際無 siáⁿ 奇巧 ê hong-sek,來紹介咱 ê 寫作。拆白講,就是有意識、計畫性 ê 寫作。我想,「做一个母語作家是人生上好 ê 投資」,鼓舞現此時有 leh 寫作 ê 有志,思考一下,hō͘ 家己母語運動行 khah 長久 leh,khah 有系統性的規劃,相信久來,絕對有一定 ê 成績。

延伸閱讀:

【特別企畫】白話字──珍貴 ê 文化資產-1
【特別企畫】期待台文 ê 米該雅-2
【特別企畫】我 ê 台文生活記持-3
【特別企畫】上帝引 Chhōa ê 台文路-4
【特別企畫】教會公報台文重頭生30冬-5

【特別企畫】牽手做伙行-7

我有話要說