【特別企畫】上帝引 Chhōa ê 台文路-4

(攝影/湯立琳)

(Chhiáⁿ an-chong Taigi Unicode jī-hêng, phòe-ha̍p Firefox Browser lâi tha̍k. 請安裝Taigi Unicode字形,配合Firefox瀏覽器來讀)

【台文版復刊30週年紀事】

1885年巴克禮牧師用 PE̍H-ŌE-JĪ(白話字)發行台灣頭一份報紙《Tâi-oân Hú-siâⁿ Kàu-hōe-pò》(今《台灣教會公報》,簡稱《教會公報》)。1969年3月中國國民黨政府禁止白話字,1049 kap 1050期合併出刊,成做最後一期 ê 白話字報紙。Kāng 年12月,《教會公報》復刊,改用中華民國語發行,停止使用84冬 ê 白話字。經過22冬後 , 1991年9月22日《教會公報》第2064期正式開設兩版〈台語特刊〉,用台語漢字 kap 白話字刊登文章。2002年,台文版由兩版縮作一版。算起來,台文版復刊到今,拄好滿30冬矣。本期 kap下期特別企畫專題,邀請歷年來佇台文版筆耕 ê 作家,分享 in ê 心情,mā 祝福台文版復刊30週年。未來 ê 路猶真長,向望讀者多多支持台文版,用母語寫作投稿《教會公報》,利益母語使用,落實台灣基督長老教會「認同所有的住民」ê 信仰告白。 (《台灣教會公報》台文版主編林碧堂)


◎ 柯柏榮

會踏入台文寫作這窟祖公仔地,作品 koh 定定發表 tī《台灣教會公報》台文版,是上帝奇妙 ê 賞賜。
2003年,我 tī 台南監獄坐監 ê 第五冬。得著聲樂老師黃南海博士 ê 牽成,對一本台語辭典學起,開始台文寫作之路。內籬仔攏會分公家 ê 宗教刊物 hō͘ 犯人讀,我對《耕心》週刊看著一个「笑容」ê 徵文廣告,就寫一篇〈純真的笑容〉華文作品投 hō͘ 週刊,chiâⁿ 幸運,有 入選,獎品是稿費 koh 加一冬份 ê《教會公報》,才知影這份報紙有「台文版」,專門收台文作品。

初初學台文寫作是寫全漢字,《教會公報》是採用漢羅濫寫,為著投稿,我著愛學羅馬字(白話字)。彼當陣,我學白話字,是「倒退學」,先 kā 逐字白話字字母、七聲八調學會曉,用音來鬥白話字。比如:我 ê 姓「柯」,是聲母「k」kap 韻母「oa」鬥–ê,聲調 kap「獅」仝調,是第一調,白話字寫做「Koa」。Koh 比如我 ê 名「榮」,是韻尾音「eng」,聲調 kap「猴」仝調,是第五調,白話字寫做「êng」。這套自學 ê 白話字拼音法,tī 以後我 leh 教台語白話字,有真緊 ê 學習效果,略約半點鐘到一點鐘就學會曉,我 kā 號做「速成法」。

 

台文,學校並無教。雖罔自細漢講台語,不過寫作文、寫批攏用華文,頭殼內攏總是華語思考。好佳哉,我一開始學文學創作,就是寫台文,中華語文 ê 毒無 kài 深,無外久就會當台語思考。(就算按呢,一寡「台語語法」mā 是 tī 2009年出獄了後,kap 台文前輩友志開講,沓沓仔學來–ê。)

投稿 hō͘ 《教會公報》前幾冬,寫–ê 攏是內籬仔 ê 代誌,無論詩、散文,文字猶足 chíⁿ,彼陣台文版主編潘秀蓮姊妹,無嫌我只是初寫 ê 菜鳥仔,投去 ê 稿,攏總刊登,這對一隻生牛仔是足大 ê 鼓舞!潘姊妹三不五時 mā 會寫批 kā 我鼓勵,tī 《教會公報》,我深深感受上帝 ê 疼!

2005年我頭擺寄兩首台語詩去參加「府城」「南瀛」文學獎,兩位攏著現代詩佳作,我才知影「原來我會曉寫詩」!

著獎 ê 肯定,加強我對文學 kôan 度 ê 要求。後手,除了投稿,mā 定定參加文學獎。逐冬,我加加減減攏會著獎,上帝 ê 禮物隨時攏 chhôan 便便 leh 等我去領!

台灣教會公報社逐冬舉辦「巴克禮文字事奉學校」課程,陳惠淑牧師兩擺邀請我去分享台文 ê 創作經驗,這對我mā 是大大 ê 肯定。

2007年,猶 leh 坐監就出第一本台語詩集《娘仔豆的春天》;2009年出獄彼冬年底,出第二本詩集《赤崁樓的情批》;2010年 koh 出第三本詩集《內籬仔的火金姑》,今年(2021)5月第四本台語 kap 華語對照 ê 詩集《記持開始食餌》燒燒出爐,這張成績單,敢 m̄ 是上帝 ê 賞賜?

對犯人到詩人作家,《教會公報》若像是我台文 ê 後頭厝,無私 ê 牽 khioh kap 栽培,hō͘ 我 tī 這條台文路,行了加足順、足精采!這敢 m̄ 是上帝 tī 頭前 leh 引 chhōa 啊!

延伸閱讀:

【特別企畫】白話字──珍貴 ê 文化資產-1
【特別企畫】期待台文 ê 米該雅-2
【特別企畫】我 ê 台文生活記持-3
【特別企畫】教會公報台文重頭生30冬-5
【特別企畫】我 ê 寫作過程-6
【特別企畫】牽手做伙行-7

我有話要說